美國攻打伊拉克第二日，港股牛皮偏軟，恒指跌15點，收報9179，成交63.5億元。長實（001）及和黃（013）公布業績後有回吐，長實跌1.6%，收47.10元，和黃跌0.6%，收46.40元。
有線寬頻（1097）宣布去年盈利倒退30%後，投資評級遭大行調低，其中更有證券行將其目標價降至0.70元。不過，股價跌至1.66元水平有支持，連日反彈，噚日升0.10元，收1.88元。
黑客提醒阿虎，九倉（004）持有80%有線寬頻，如果聯交所唔再畀豁免，九倉就要減持5%股權，若冇人接貨，股價當然會受壓。不過，連銀河衛視都有美資入股，照計九倉要為有線搵個策略性投資者應該唔太難。市場現時憧憬有線將引入有實力投資者，所以近日股價造好。
裕元工業（551）上月正式拆細後，吸引唔少投資者入市追捧，股價曾升至16.25元，其後雖有回吐，但在大股東不斷增持下，股價再度回升，噚日平收16.10元。
Cookie話，裕元有復甦概念，基金早已虎視眈眈，公司早前公布的首季業績表現不俗，盈利有36%增長，近期資金開始回流股市，裕元勢必成為基金吸納對象，實在不容忽視。
中國燃氣（384）近日獲星洲資金購入26%股權，阿虎唔少朋友都以為隻股有排炒，點知消息曝光後，股價全無鑊氣。
ｉ師傅話，今次中國燃氣引入業高作為主要股東，主要是因為恒鋒（185）等錢使，而業高入股只係半推半就，根本無意將中國燃氣大搞，亦無意向中國燃氣注資，日後若恒鋒有多餘錢，可能再增持中國燃氣，至於在市場直接吸納或向業高買回，就係後話。
阿虎