黃卓玲和恩師杜琪峯在新片《PTU》中再度合作，她對杜琪峯的感覺是又愛又恨，因為阿杜十分惡死，一做錯就鬧，所以一見他就會很緊張。但另一方面，杜琪峯對黃卓玲「愛之深，鬧之切」，又令到她演技大有進步。
由杜琪峯執導的警匪片《PTU》將於下月十日上映，黃卓玲在片中飾演一名女幫辦。而當年帶黃卓玲入行的正是杜琪峯，她亦簽了對方做經理人，轉眼間五年合約時間已經過，黃卓玲現時自己接工作，提起杜琪峯這位恩師，她的感覺是又愛又恨。
黃卓玲說：「我同阿杜嘅關係幾得意，初時佢係我師傅，後來變為朋友。但到𠵱家為止，只要一開工，我見到佢都會好緊張，有時會憎佢，因為佢做起嘢嚟好鬼惡死，做得唔好就鬧。有時我會諗，我都做咗咁多年咯，你重鬧？但係諗番轉頭，佢鬧我，都係為我好，鬧人都要用力㗎。的而且確，佢呢個方法對我有用，令我快啲進步，所以我對佢又愛又恨。」
黃卓玲續說：「記得有一場戲我哋一齊喺茶餐廳拍攝，因為我見到佢好嚴肅嘅樣，所以我一直都唔夠膽同佢講嘢。直到夜晚十一點食消夜時間，佢居然叫人落嚟叫我一齊食消夜，嗰陣時都好開心！」
在電視劇《撲水冤家》中，黃卓玲飾演一名火爆兼失魂的女警尹小玲，令人印象深刻，她說：「其實拍電影同電視劇好唔同，拍電影控制喺導演手，而電視劇就靠自己。初時會有擔心，但係做落都好好，有好大嘅發揮。」
採訪：張止寒、羅慧敏
攝影：陳志嵐
髮型：HermanLai（O4Osmosis）
服裝：BCBGMAXAZRIA、Morgan、Guess
場地提供：L16摩登泰國餐廳（香港公園）
