美伊開戰，八方馬上要消假返工，而台灣大批同事亦立即行動，喺正式發行前，搶先出版台灣《蘋果日報》號外，特刊四大張、十六頁版版彩色，印五十萬份，報道最新戰爭情況同戰情分析，同步喺台北、台中、高雄免費發行，於車站、捷運、百貨公司等市區熱鬧地點派發，贈送三地都會區民眾。
台灣《蘋果》初試啼聲，八方噚晚率先睇過傳真版，嘩，都幾勁，台灣班同事據說亦好High，但肥佬黎就好似冇乜表情；發行部經理陳貴民話，喺台北市，派報車一卸下八千份報紙，民眾就爭相搶閱，「下一班車還來不及出車，馬上就已經發光。」
原來開戰前夕，台灣同事買咗睡袋，喺辦公室過夜，開戰後，當然忙作一團，飯都唔記得食，砌足幾個鐘，但辛苦還辛苦，眼見份號外誕生，佢哋話乜都抵番，因為未見過一份咁靚嘅報紙。
正在台灣督師嘅總裁堅哥形容，今次成功出版，可說驚險百出，簡直係驚濤駭浪，主要原因係印刷機未Run好，而讀者反應，堅哥話幾受歡迎，梗係啦，唔使錢噃。至於老總陳裕鑫就攰到喺公司瞓着。
（圖）喺台北西門町，市民爭相搶閱台灣《蘋果》嘅美伊開戰號外。「海珊」即係「侯賽因」。
傳真︰2623-9278
電郵︰