唔知大家有冇上網DownloadMP3同遊戲等習慣，自從mp3.com被告上法庭之後，isonews.com亦被美國法庭裁定販賣改機IC罪成，相信嚟緊會有更多呢類型嘅官司出現，香港前一陣亦有唔少改機IC喺市面上發售，其實改機同翻版呢個兩面刀，一方面可以谷起主機銷量，但係一方面亦會將原裝市場摧毀，君不見香港真真正正只賣正版嘅舖頭愈嚟愈少，所以真係支持原裝就咪去改機喇！
文：打機鐵人
據消息3月27日3機種同時發售嘅《SoulCalibur2》，XBOX版行版會延至4月頭，而日本版則不變，唔知咁會唔會影響XBOX版嘅銷路，話晒香港好少人只係得XBOX而無其他主機，隨時俾PS2同GC飲頭啖湯。
銷量保證嘅機戰系列，27號又嚟搶錢喇！行貨定價$399，限定版則$550，不過日本版就會多送一隻DVDVideo。除咗機戰外，嚟緊呢個星期都算熱鬧，中文版《阿格斯戰士》會有大型宣傳活動配合，行貨定價都只不過$218，話晒隻Game唔太貴，有興趣不妨支持一下。
月尾CAPCOM隻《P.N.03》宣傳活動已經開始，有行開Game舖嘅朋友應該會見到一個二個大型宣傳紙牌，今次隻Game來貨唔多，有興趣好快入手。另GC美版《Zelda》如無意外會今個星期殺到，連特典$480左右。