長江和黃系噚日公布業績，超人李嘉誠難得露面，八方當然要去湊熱鬧，問吓佢老人家對近期大事嘅睇法。首先，當然係非典型肺炎，誠哥第一句就答「你睇我有冇戴口罩」，原來有唔少人買定口罩畀佢，但佢話唔使。誠哥覺得「香港人應多謝醫護人員」，佢重話其父亦係死於肺病，當年冇錢醫，反觀今時今日香港醫護水平，唔使擔心錢，而且佢對香港嘅醫護水平有信心。
第二個問題當然係阿松買車事件。同阿松份屬波友嘅誠哥，叫八方一定要引述佢嘅原話：「梁錦松唔係一個貪唔應得到利益嘅人，亦係誠實可靠嘅人；今次事件，佢嘅代價都好大。」咁阿松應唔應辭職？誠哥冇直接答，但就話：「如果我係佢，就唔會辭職。」相信阿松對以上嘅回應，當有「知我者莫若誠哥」嘅感覺。
傳真︰2623-9278
電郵︰