梳打埠呢個禮拜開始會提供埋日本JLeague賽事嘅博彩盤口，我求大俠唔係幫人賣廣告，只係戥各位港澳波友愈嚟愈唔得閒，以後真係二十四小時「全方位」都有得你賭囉！
大家睇下禮拜五、六、日個時間表，攝埋晏晝開波嘅JLeague落嚟，波友真係會好唔得閒！好似呢幾日咁，首先係朝早嘅NBA，之後晏晝JLeague同中國甲A，夜晚就刨定歐洲各大聯賽賽事至通宵達旦，個schedule咁充實，如果沉迷足、籃嘅賭友，真係要請番個秘書至搞得掂！
講番JLeague，我求大俠即時走去搵本報名家戰鬥員A，佢大哥亦去現場睇過唔少日本波，佢就話季初暫時對讓超過一球嘅球隊有戒心，至於有乜貼士，留意佢呢兩日撰寫嘅大作啦！
新特蘭今季降班差不多已成定局，就連中場基爾賓尼都對護級期望唔大，但係佢就幫自己隊友定下目標，話就算包尾都唔好打破屈福特喺九九至○○年打三十八場得二十四分嘅英超聯歷來最差紀錄。新特蘭現時得十九分，雖然重有八場未踢，但係班球員𠵱家無心戀戰，抱贏輸都冇所謂嘅心態，我求大俠覺得佢哋攞六分都唔係易㗎。
巴塞隆拿攞西甲冠軍係癡人說夢，但喺歐冠盃就唔係人咁品，雖然一早出線八強，但前晚作客照贏紐卡素兩粒。我求大俠話歐冠盃係呢隊波嘅還魂丹，教練安迪下屆留唔留到隊，亦係睇呢個賽事，於是佢話就算八強對皇馬亦唔驚；至於另外兩個可能對手祖雲達斯同阿積士如果對住巴塞，真係可以話係抽下籤。
溜馬計時炸彈阿達斯，喺噚日對塞爾特人場波又發癲。開波唔夠六秒，佢就因為惡意侵犯皮雅斯，俾球證吹罰咗今季第八個蓄意犯規，要自動罰停賽兩場。佢賽後重理直氣壯話唔會改變自己嘅粗野作風。溜馬喺明星賽後已經輸到一仆一碌，𠵱家跌落東岸第四位，「身負重任」嘅阿達斯竟然重死性不改，球隊入到季後賽都算執到囉。
約基由曼聯風流到布力般，話說呢位床上鬥士，最近喺格拉斯哥搭上二十三歲金髮模特兒琳妮，迅速火辣辣。我求大俠話食色性也，約基冇話做錯，不過佢嘅拍檔高爾最近就俾領隊桑拿士雪藏，如果約基有乜行差踏錯，影響布力般來屆足協盃嘅機會就大罪囉，約基你為咗隊波，識女仔都係低調啲好。