施念慈將推出有關美容和化妝的書籍，同大家分享她的美容心得。施念慈表示曾因為貪平用錯護膚品，而要花數千元看皮膚科醫生，得不償失，而平時施念慈會和老公陳鴻業在家中替對方做面膜，增進感情。
施念慈將會在本月內推出一本美容書和一本化妝書，和大家分享她的美容護膚心得。
施念慈曾經因為貪平用錯護膚品而搞到皮膚敏感，所以她奉勸大家，護膚和化妝品一定要講求質素，因為貪平而搞到要睇醫生，真是得不償失。
施念慈說：「我試過貪平搞到睇皮膚科醫生，使成幾千蚊，用護膚品最緊要睇吓適唔適合自己。喺書入面，我所有推介嘅牌子，都係我親自用過，覺得品質好先會介紹。喺未入娛樂圈之前，我對化妝、護膚品認識唔多，入行後就乜牌子都試，其實好浪費，有啲產品買返嚟先知唔啱用，屋企擺埋咗一大堆，每個月都使成幾千蚊。」
現時施念慈每年獲得近六位數字的化妝及護膚品贊助，為荷包省回不少，而今次她出書亦獲得不少美容品牌贊助。
施念慈說：「化妝雖然可以化醜為妍，不過我覺得護膚先係最重要，因為個底打得好，就算化淡妝已經好靚。喺書入面，我除咗介紹有牌子嘅護膚品之外，我重會介紹大家用啲天然物品護膚同美白，好似蛋白咁，成效都好大，唔使吓吓都要買貴價牌子嘅。」
而施念慈平日亦會和老公陳鴻業在家中替對方做面膜，她說：「雖然佢係男人，但都貪靚㗎，不過佢只係做清潔面膜啫，冇我咁多花款。」
採訪：張止寒
