話晒美伊正在打緊仗，小初唔明點解港股會繼續升？收市後小初落中環歎茶，正當小初坐低之際，剛好就見到經紀黃，佢問小初記唔記得舊年炒過嘅唯冠國際（334）？
小初梗係記得，呢隻股股價上落之大，真係愛冒險如小初之流都暗嘆頂唔順，差啲搞到贏粒糖輸間廠。經紀陳話，隻股今日公布中期業績，聽講話會靚仔到你唔信，起碼賺6000萬元以上。
若果係真嘅話，小初相信會激到嘔血。小初記得，隻股舊年由1元水平逐步下跌，在公布全年業績前，有春江鴨知道業績樣衰，急急沽出，收尾一度跌至0.305元水平。其實小初見隻股近排拾級而上，炒番上0.90元樓上，都知道有古怪。
經紀黃話，唯冠舊年虧損7750萬元，主要為一家台灣公司嘅長期投資，作出6510萬元減值。今次中期業績冇咗呢樣因素，加上定單又確係多咗，所以賺錢係好正常。不過，由於股價已經升咗咁多，須防有人會趁好消息出貨。
慕容小初