美國昨日正式向伊拉克開火，令到波斯灣一帶局勢緊張。至於有家人在美國定居的鄭中基、傅明憲及薛家燕等均對家人的安全問題擔心不已。此外，印尼峇里島去年發生恐怖爆炸事件，為宣揚和平訊息，有關方面將於下月二十二日在峇里島舉行和平演唱會，邀請周杰倫以及來自法國、美國、印度、俄羅斯和澳洲等地的歌手參與演出。
不應該有戰爭
我剛從北京來港，都知道美國和伊拉克已開戰，真的感到遺憾，不應該有戰爭。對於香港有非典型肺炎，我都有一點害怕。
希望一家團圓
我已經即刻打畀我媽咪同細妹，我屋企得佢兩個女人喺美國，我阿媽話佢嗰邊冇乜嘢，雖然𠵱家都好平安，但我都幾擔心，所以叫佢哋趁𠵱家未有管制就返香港先，起碼一家人一齊會安心啲。我老竇去咗日本開會，做完嘢都會返嚟先。最好拿拿臨打完仗，希望唔好死傷咁多人啦。
機場保安嚴密
我早兩日先至喺美國洛杉磯返嚟，當時美國機場已經好緊張好嚴密，講明所有寄倉行李唔可以上鎖，方便海關進行搜查，但我一時唔記得，結果行李俾海關劈爛咗。其實我哥哥一直住喺洛杉磯，但我相信應該都安全嘅。
照樣赴美𢱑銀
我下個月中要去美國康州登台，如果唔會管制外國人入境，我都會照去嘅，安唔安全唔驚得咁多，總之希望場仗快啲打完啦。
勸女兒勿搭機
我噚晚三、四點已經不停打畀喺加州嘅囡囡，𠵱家囡囡放緊春節大假，學校剩低佢一個喺宿舍，本來聽日佢想飛去波士頓搵同學，但係我都勸佢𠵱家唔好搭飛機住，叫佢搭車去三藩市其他同學屋企。
陳曼娜 ：我個仔𠵱家喺美國紐約嘅Connell醫院做醫生，我做媽咪嘅梗係擔心啦，我都諗住一陣間打電話畀佢睇吓佢哋嗰邊點，呢個時候又點可以離開崗位？
梁詠琳 ：打仗前一晚我啱啱先至返嚟三藩市，入境就好緊張，海關搜得好嚴，好似有個中東人入境，即刻有四、五個警察圍住佢搜身，慎防恐怖分子搞事。
唐文龍 ：我喺美國大，爹啲、媽咪同哥哥都住喺美國，所以都好擔心，惟有叫佢哋暫時唔好搭飛機。其實有好多喺美國嘅人都反戰，我哥哥都去咗示威。
