由鷹君同市建局合作，位於旺角上海街嘅市區重建項目，下個禮拜一舉行記招，內容係物業命名儀式。鷹君主席羅嘉瑞同市建局主席劉華森自然到場主持大局。
呢個市區重建項目可以話見證咗香港樓市興衰，因為由簽約到𠵱家已超過十年，政府一方重由土地發展公司變為市建局，主席都換咗幾次。
發展商會安排傳媒參觀，記者可以攞到最新資料；同場重會有個特備環節，得獎者有機會免費遊日本。果然特別得嚟又夠大手筆。
呢個活動先係參觀地盤，然後就移師到尖沙嘴鷹君酒店舉行命名儀式。佢哋重話，到時會展示項目嘅標誌。
呢個項目包括商場、寫字樓同酒店，明年應該可以落成。
但係𠵱家市道咁差，到時發展商搵租客可能都幾頭痛。
自從內地旅客成為本港旅遊業主要動力後，三四星級酒店成為投資者追捧對象，原本由敦煌酒樓集團持有嘅油麻地萬年青酒店，前年一月由張姓投資者購入，去年年尾開始分拆出售，近日以逾三千三百九十萬元賣咗，間酒店魅力非凡，中原同美聯兩家代理行都齊齊出稿講呢單買賣。
據促成買賣嘅美聯物業盧展豪講，物業包括酒店地下入口、一至三樓全層、四樓部份樓面，總共一萬九千七百幾呎，每呎一千七百幾元，每個房間成交金額約五十萬元。酒店有六十八間房，每月收二十五萬租金，回報率八厘八。
至於中原地產黃偉基就透露，買家係本地資深投資者，見物業回報高，以私人協商方式購入。
美伊戰事醞釀多時，噚日終於爆發。喺戰爭陰影籠罩下，地產代理今個月嘅生意不跌反升，中原地產執行董事陳永傑話，主要原因係一手同二手樓齊齊減價，吸引買家入市，單係豪宅，今個月成交總值就有五十億。
睇番中記網頁，今個月截至十九號，住宅部佣金收入已經接近四千二百萬，比上個月升咗四成。但係陳永傑話，相信開戰後就冇咁好世界。
美聯物業為咗強化研究部，特別設立首席分析師一職，坐鎮大本營，新上任嘅人兄叫劉嘉輝。佢來頭唔細，九五年已經喺瑞士銀行做分析員，做咗五、六年，又轉去新日本證券做研究部經理，三個禮拜前，先正式加入美聯。
佢剛上任，就撞正美伊開戰，首項任務係成立戰事地產資訊中心，即時更新各區成交同叫價，責任重大，時間緊迫，噚日連卡片都未印好就要同傳媒解畫。
對於打仗，九龍倉嘅態度似乎係一於好少理，佢哋宣布，明日推出屯門翠濤居最後四個頂層單位。
呢批單位分布喺第五同六座，面積七百幾至近一千呎，重有約三百至五百七十呎空中花園，呎價介乎二千四到二千八蚊。
買頂層三房單位，重可以獲贈一個價值二十萬嘅車位，買兩房單位就可以半價買車位。
翠濤居已開售一段時間，貨尾唔多，所以九倉唔太擔心銷情。
蘭西
電郵地址：
