PS2喺呢兩個月可謂勁作多多，雖然玩家重未消化得晒，不過四、五月新一輪PS2勁Game攻勢又打到嚟。SCEH為香港傳媒率先安排一批新Game試玩，當中包括多款萬眾期待嘅正Game，今日精選幾款新作實地測試，重搵嚟《GAMEWATCH》編輯福田及魚生逐一評論㖭。
記者：徐影龍
今次一共提供11隻未發售新Game試玩，最矚目是Namco嘅《SoulCalibur2》，會在三大主機跨平台登場，各有獨家新增人物，PS2版加入《鐵拳》經典人物三島平八，另外尚有五位隱藏人物未現身。遊戲畫面令人讚歎，場景豐富，人物多邊形模型做得非常好，手腳等關節唔覺有突兀嘅接駁位，對打時動作及必殺技表現出色有氣勢。試玩版玩到街機、對打等模式外，重有名為「WeaponMaster」模式，要完成各式指定任務，如限時內戰勝對手、保持某段時間不敗等，全破後有咩獎賞則仍未清楚。
推出日期：3月27日
《阿格斯戰士》屬SCEH近期力推嘅大作，雖然早前曾推出日文版，不過日文介面令香港機迷玩得不明不白之餘，武器道具用途亦不甚了解。今次行貨以完全中文化登場，故事講乜、點玩即刻清楚晒。遊戲內容基本上同日文版一樣，羅馬式故事背景好神話化，敵人及首領設計好有新鮮感，主角手持血滴子形武器破壞力驚人，遊戲亦設定版圖上頗多物件可遭破壞，相當之有爽快感。今次SCEH除咗請嚟監製兼松聰到港會Fans外，重製作咗一款「阿格斯戰士」搖搖送畀機迷，夠晒誠意。
推出日期：今日
世嘉人氣超大作，亦係首次登陸PS2上。一改以往遊戲單對單玩法，以各式機械人完成不同任務為主，玩法跟極受歡迎嘅《高達》頗為類似，相信新、舊機迷都吸引到。除故事模式外，VS雙打模式更提供副機選擇，同場中變成2對2嘅混戰局面，算幾刺激，可惜由於要五月先推出關係，試玩版存有頗多問題，如背景簡陋、音樂單調及任務選擇不多等，希望到正式推出時作大幅改良。
推出日期：5月29日
福田評語：「好明顯世嘉想借PS2進一步擴大《Virtual-On》嘅市場，不過個人認為新玩法認真麻麻，雖屬任務形式，不過嚟嚟去去得小貓一、兩隻同你打，又冇摧毀目標又冇護航運輸機，希望係試玩版關係喇。」
SNK/Palymore除《拳皇》系列外，最受歡迎可算係橫向動作Game《MetalSlug》系列。今次理所當然地100%移植街機，畫面及Load碟情況都做得唔錯。大堆頭敵人圍攻玩法夠晒刺激，雙打亦可充份發揮合作精神。家用版最大特色係加入「UFO母艦突入作戰」及「肥仔作戰」模式，可惜試玩版未能啟動呢兩個模式，實際內容未明。
推出日期：3月24日
魚生評語：「遊戲流程唔算短，加上難度及新加模式，應該頗為襟玩。」
從日本廠商願意發放大批新Game畀香港傳媒試玩，以及陸續推出中文化作品，都可見香港及亞洲市場日益受到重視。筆者最想試玩的《超級機械人大戰αII》及《TOD2》中文版，因SCEH仍未收到日本廠商嘅試玩金碟而未能一試，非常可惜。