聽立法會議員質詢梁錦松，聽到不忍，堂堂一個大賓架，假假地統領過萬國寶通銀行，又係大通銀行亞太區主席，點會搞到如此田地，喺立法會俾議員狂抦，跡近侮辱呀。唉，為咗一架車（佢又唔係冇車），竟然成為萬人出氣袋，真係「折墮」，（附帶一提，陳偉業議員在立法會講：墊董建華屍底！粗俗得過份，絕對不符立法會議員身份，在立法會咁樣講，實情教壞細路，希望佢以後發言文雅一啲，立法會唔係廟街也。）
梁錦松今日威風掃地，威信盡失，倘若即時辭職，對佢冇乜損失，倘若特首要佢留低，以忍辱負重之身，帶罪立功，有排佢捱。譬如話，如果明年財政赤字繼續高企於六七百億元，阿松重邊度可以將功贖罪呢？為咗買一架新車，鑄成大錯，甚至終身遺憾，連累埋香港特區，呢個人為疏失，代價大矣哉。
上一位商界大班出任財政司，就係彭勵治，當時嘅布政司（即今日政務司）係夏鼎基。夏鼎基就係曾蔭權師傅，從財政司升上布政司職位，與彭勵治相當合作，面對中英談判，人心不穩，金融風暴危機，臨危不亂，挽狂瀾於既倒。
今日曾蔭權步師傅後塵，做完財政司做政務司，賓架出任財政司，基本上係夏彭嘅翻版，點解今次唔掂呢？係領導人之過，還是曾梁兩人冇夏彭兩人咁醒，或者冇合作？
有謂人和政通，但政府高層都未通氣，特區邊會有運行。