美伊開戰，恒指早段最高升124點，埋單升35點。有唔少市場人士一早估話開戰後股市會升，不過恒指由上周最低位起計已彈升超過400點，計埋滙控（005）同恒生（011）除息因素，升幅更超過500點，一啲藍籌挾空倉亦可能告一段落，大市再升嘅水位恐怕有限。𠵱家追Call輪，風險大過回報，博唔過，冇平貨執嘅話，忍手為上。
要做嘢，不如揀少少恒指Put輪揸吓，博大市調整。對象有9587同9619，兩隻輪都係交投非常活躍，賺蝕都可以隨時快趣計數。
滙豐（005）收83.75元，微升1格，暫時估計唔易再上，搵啲滙控Put輪埋手，條件最靚嘅係9578，下月下旬到期，現價28仙，溢價只係1.9%，槓桿率有差不多30倍，好夠爆炸力。其次6月夠鐘嘅9669亦可以諗吓，現價36仙，溢價高啲，去到4%，槓桿率有23.2倍。
中移動（941）成績表唔錯，但股價亦已反映，昨收17.30元，再升15仙。由上周低位起計，足足升咗2元，吼位再升多少，搵啲Put輪買吓。
最好等正股彈上接近18元齊頭，趁低買Put輪，對象有兩件，9611同9722。9611今年5月到期，現價17.3仙，溢價6%，槓桿率10倍，呢隻數據靚過9772。
章盛