港交所行政總裁鄺其志下月離任，除咗要捨棄近八百萬元嘅年薪，佢手上大批認股權亦惹人關注，據聯交所最新資料，鄺神童一年前行使認股權每股七點五二元，買入三十六萬二千股港交所股份，今個星期三沽晒，平均沽售價九點四四元，計落賺咗六十九萬元，差唔多係佢一個月人工，當出雙糧，因為鄺總裁舊年冇得分花紅。
八方前晚亦喺馬會見到鄺神童同李業廣，原來第七場跑交易所盃，睇怕都係鄺神童最後一次以行政總裁身份出席賽事，八方冷眼旁觀，鄺神童同李業廣以及馬會主席夏佳理都笑得好開心，唔知係咪慶幸大家都同阿董、阿松保持距離，冇受今次特區綜合症嘅感染？
呢個禮拜日又跑一年一度打吡，剛好撞正中產大遊行，呢場大賽已有百幾年歷史，獎金有成千四萬㗎。
傳真︰2623-9278
電郵︰