80'S至90'S，可以話係街機嘅黃金年代，想當年邊有咁多OnlineGame，家用機又邊有街機畫面咁靚，再加上大部份遊戲機大廠都為街機開發遊戲，所以嗰個年頭名Game輩出；唔係生於嗰個年代？當時太細個唔入得機舖？唔緊要！最近有機舖都將呢啲經典Game攞出嚟翻打，想時光倒流，舊Game變時興，都唔係冇可能！
記者、攝影：朱崇德
Model：Keith、Hiro、Stephen、Jophic
（新星堡娛樂製作有限公司）
年代：1987年 $2一局
《特殊部隊》差唔多係與《1942》、《1943》同期，而且係一樣咁出名嘅射擊遊戲，想當年邊間機舖冇呢隻Game，真係可以大膽講句「聽執笠」都得喇！所以好多有番咁上下年資嘅機舖，點都會留番一塊半塊佢嘅機板喺倉。而近期機舖興舊Game，所以亦好順理成章，變為最多機舖攞出嚟玩嘅舊Game。𠵱家好多射擊Game變種推出，都可算全係佢嘅啟蒙！
年代：1992年 $2一局
論最襟Hit嘅經典Game，我諗非《三國誌II》莫屬！佢可算係橫向動作遊戲殿堂之作，近年都唔知有幾多台灣遊戲開發公司，都要翻抄佢個系統嚟出「三國」遊戲！而且好多機舖老闆都話，每當攞番隻《三國誌II》出嚟玩，每日收入閒閒哋都可以同好多新Game看齊！
《三國》風味濃亦係街機中少見，每版故事都同原著好相近，想當年小記後生時，都唔知靠佢溫熟幾多三國歷史！
年代：1989年 $2一局
《FinalFight》係另一隻橫向動作經典之作，而且年期重要比《三國誌II》更早；不過唔知點解，相對先前介紹嘅兩隻Game，真係唔係太多機舖有得打！全個Game大概有8至9個場景，兩個人夾埋$4打成粒鐘，真係機舖最低消費啦！
年代：1997 $2一局
《拳皇》系列，由94年嘅第一代開始，平均每年都會出一代新版Update，到咗今日嘅《拳皇2002》，先後就橫跨咗近10個年頭（出咗9代），喺技擊Game中亦獨領風騷咁多年！不過講到舊版《拳皇》中，最為人津津樂道嘅，都係《拳皇97》，因為佢係首次加入咗AdvancedMode同ExtraMode兩種模式系統，而當能源槽蓄到MAX時，可以隨意使出各種超必殺技同防守反技！可以話集最早三代之大成、經典中嘅經典！
金星遊戲機中心
地址：尖沙嘴加拿芬道20號加拿芬廣場地下 電話：27236235
近排逛機舖，發現一款「舊Game系列」出現咗，基本上佢一部機之內，閒閒哋就有成50款Game；用法同一般模擬器幾類似，先在畫面左面選擇遊戲，而右邊則有輔助遊戲畫面，畀你睇版，揀啱按Start就玩得！
裏面啲Game真係好經典！《炸彈人》（1997年）、《最後之忍道》（1988年）、《BobbleBobble》（1986）、《魔界村》及《烏蠅機》等，都全部有得打！
88遊戲機中心
地址：尖沙嘴金巴利道25號地庫
玩懷舊都唔可以錯過最新正Game，名氣槍Game《TimeCrisis3》，今個星期終於殺落尖沙嘴金星遊戲機中心，而且人氣度真係一時無兩，早排勁Hit嘅喪屍版雷霆救兵《WORLDCOMBAT》同《鬼屋3》，都馬上俾佢比下去，得番小貓三兩隻玩！
今次新一集《TimeCrisis3》，仍然保留番佢嘅成名絕技——「腳踏閃避系統」；至於新加入元素，就係玩者喺閃避時，可以用「射擊掣」換槍，槍種包括有手槍、輕機槍、散彈槍同爆彈槍等！至於畫面方面，唔知街機迷係咪已經被寵慣晒，好多人都話無甚驚喜，不過小記問心，3D畫面超滑淨，而且好流暢，真係比早兩代正好多，而且每邊玩家畫面有成30餘吋，打起上嚟好震撼！