港股連續第3日上升，形勢已由淡轉穩，噚日恒指一度衝上9281高位（期指曾高見9388），暫時受制於9300點關口阻力，收市報9194，升35點，期指仍保持高水，成交活躍，有87億元，動力仍強，能否破關而上，則要視乎美伊戰事進展而定。
大市重點暫時仍在藍籌和大價股身上，國企和二三線股則個別發展，待藍籌唞氣之時，細價股將會接力而上。不過，噚日已有唔少股仔捲土重來，佢哋早輪急升後，調整咗一輪，家吓升勢再現，又可以再上車。
彩星集團（635）低見0.58元後搶上0.64元收，升3仙，重上10日同20日線之上，且有大成交支持，升勢確認，近日高位0.68元會有少許阻力，衝破後，以量度升幅計，目標指向0.95元。2月底，彩星曾升見0.85元，今次可再創今年新高。
90年代，彩星靠「龜」發達，成為股壇佳話，今次呢隻新一代嘅忍者龜更犀飛利，在美國已經橫掃，彩星重計劃將呢隻龜帶入歐洲、日本同中國市場，市場一受落，盈利就會三級跳。03年，保守估計盈利有1億元，每股盈利10仙，但忍者龜帶來嘅收益可大可小，若果再添多億零兩億元，不得了，每股盈利去到成30仙，以保守PE4倍計，你話股價會見幾多？
另一隻走勢再現突破嘅實力股係亞洲鋁業（930），高收0.86元，升4仙，一舉而突破個多月來的徘徊區（0.71元至0.83元），短線可見0.95元。若以周線圖衡量，由去年5月開始，走勢形成一個大V底，今次破位而上，中線目標為1.15元。
亞鋁剛宣布業績，02年12月止半年營業額11億元，增17.4%，盈利1.77億元，大增83.7%，每股盈利7.43仙，派息連特別息2.5仙，盈利包括出售附屬公司的特殊收益5240萬元。
全年度估計，盈利不會少過3億元，每股盈利12仙，派息合共5仙，預測PE7.1倍，息率有6厘，係一隻揸得安心，又有機會賺價的收息股。亞鋁已在中港兩地取得多項大型建築物合約，並正磋商迪士尼樂園及澳門賭場等多項供應合約，未來盈利仍可保持高增長。
郭兆誠