啱啱由北京開完人大會議返港嘅李鵬飛，噚日出席一個論壇滙報兩會情況。講到梁錦松偷步買車事件，飛哥感歎「佢太唔小心嘞！」重講到明，財爺好難唔落台，勉強做落去，自信心同公信力都冇晒，特首今次挽留佢，自己都「揩嘢」。咁第三屆特首，阿松重有冇機？飛哥坦白得可愛：「冇囉！佢玩完囉！」
不過對於行會會議不利阿松嘅內容外洩，做過八年行政局嘅飛哥非常不滿，認為顯示行會有內鬥。講完阿松講打仗，飛哥認為美國佬一定打贏，以後身為戰勝國會更加惡死，對中國嘅態度同壓力都會好大。
葉國謙議員亦喺立法會辯論反戰議案時，指摘美國等同侵略。但原來阿謙個仔舊年啱啱去咗紐約長島大學讀MBA，個女就喺另一個贊成開戰嘅國家澳洲，唔怪得阿謙一知開戰，第一時間打畀阿仔叫佢唔好隨便出街。
傳真︰2623-9278
電郵︰