黃秋生噚日喺銅鑼灣舉行嘅「香港話劇團2003/04節目」記者會，大鬧美國總統布殊、香港特首董建華同埋財政司司長梁錦松。
秋生話：「美國佬好似打世界盃咁，當人命唔係嘢，大蝦細畀屎餵，話去伊拉克檢查武器，其實係繳完械之後就打人。總統應該為呢次戰爭負責，布殊同拉登根本就係兩兄弟，兩個都係世界恐怖分子。」
秋生又提到阿松偷步買車件事，佢好勞氣咁話：「胡錦濤（新任國家主席）都同上海佬（董建華）話要妥善處理，係咪聽唔明白高官意思？佢即係話處理得唔夠妥善，𠵱家冇人叫佢做特首，嗌佢做肥佬同阿伯，完全冇晒尊嚴。」
秋生愈鬧愈勁，佢話：「呢件事佢兩個係同謀，梁錦松咁冇警覺性，就唔適合做呢個位，佢最好返屋企湊女，老婆（伏明霞）出番嚟插水，佢留喺屋企煮飯重安樂。」
羅慧娟早排去咗泰國五日，拍攝《天賜良源》特輯。娟妹噚日同馮仁昭講，話今次係拍稻米種植，佢話自己係城市人，第一次落田就發生瘀事，事緣有個鏡頭要落田拍插秧，佢就着咗對水靴落田，點知對靴俾啲泥阻住行唔郁，搞到每行一步都要人扶，即場俾人笑到面都黃。
容祖兒噚日去新城接受訪問，佢近日因為要喺新劇《美麗在望》中飾演肥妹，攞正牌任食，以前公司唔畀食嘅可以勁食，重可以同同事消夜，爽到震。
祖兒好開心咁話：「從來未試過有咁嘅優差，不過我𠵱家重係食飯唔食肉，食得好飽都要食，可能因為佢哋想我演肥妹演得維肖維妙。總之我要肥到塊面似西環浮屍啦，重要有巨籮㖭！」
馮仁昭噚日收到風，霍震霆會擔任下個禮拜六（三月二十九號）舉行嘅第八屆金紫荊電影頒獎禮嘅主禮嘉賓。
而金紫荊嘅司儀組合都已經落實咗，男司儀有梁思浩同吳家樂，女司儀就係鄭希怡（Yumiko），佢今次係第一次做司儀，相信都會有啲新鮮感，我馮仁昭都想睇吓Yumiko有冇做司儀嘅天份。
張堅庭日前喺商台做嘉賓主持時彈梁詠琪（GiGi）歌藝唔得，重暗示GiGi係天山童姥，呢番言論惹起GiGi歌迷不滿，就連楊千嬅嘅fans都「辣㷫」埋，千嬅嘅fans重特登打電話去張堅庭嘅茶餐廳投訴。對於呢件事，張堅庭噚日喺節目話諗諗吓都覺得自己唔啱，而佢重為「天山童姥」嘅言論向GiGi同千嬅道歉，重講笑話今日會引咎辭職，查實佢根本就係做埋今日。
