關錦鵬執導、李嘉欣主演嘅內地電視劇《畫魂》，早前俾內地作家石楠話侵犯咗佢本小說《畫魂──潘玉良傳》嘅版權，搞到差啲拍唔成。
《畫魂》早年曾被改編成電影，由鞏俐扮演妓女出身嘅著名人體畫家潘玉良，今次《畫》劇就由李嘉欣扮演。潘玉良雖然曾做妓女，但導演作出少少改動，嘉欣只係扮演青樓入面嘅婢女！
石楠日前聲稱套劇冇經佢同意就開拍，侵犯咗版權，不過《畫》劇嘅台灣發言人吳敦就話石楠曾經將劇本賣畀邵氏，佢哋係同邵氏買版權，重簽晒合約㖭。
噚日馮仁昭打電話畀石楠，佢話成件事純屬誤會，佢呢兩日分別收到邵氏同台灣方面嘅電話，兩邊都同佢講唔好意思。邵氏將版權賣咗畀台灣嘅金鼎，今次呢套劇係金鼎同內地嘅亞環公司合作拍攝，但係邵氏同金鼎都冇將呢件事通知石楠，所以佢唔知道來龍去脈。
邵氏同金鼎嘅解釋都係因為冇咗石楠嘅聯絡電話，所以通知唔到佢，但石楠對呢個解釋似乎有啲微言，佢話呢個世界想搵一個人一定有辦法，好似馮仁昭都搵到佢啦！
二人組合Boy'Z擔任嘅「護苗新一代」，噚日喺元朗幫護苗教育巡迴車上色。Boy'Z兩個雞手鴨腳，張致恒（Steven）整到成隻右手都係油漆，關智斌（Kenny）連頭髮都揩到油，佢話：「唔通呢啲係雀屎？」
Steven就話近日冇收過緋聞女友黃榕嘅電話，問佢覺唔覺俾黃榕借宣傳？佢話：「唔會，佢自己小心啲啦！」
已經四十歲嘅王傑噚日接受台灣傳媒訪問，佢話自從皈依密宗後，慢慢發覺自己有預知能力，不過王傑覺得最恐怖嘅，係有算命師傅話佢只會活到四十八歲，連佢個密宗師傅都係咁講，但王傑話唔怕死喎！
蘇永康上月去加拿大登台，重去咗醫院探訪，康仔見到好多瞓喺氧氣箱、早產嘅BB，有啲只得五個月大，要住喺氧氣箱到十個月大，先可以出院。康仔話：「見到啲小生命，我覺得好感動。我同太太暫時未打算生細路，因為生BB要擔心好多嘢。」
趙頌茹（阿Yu）噚日去元朗，為護苗教育巡迴車上色。
阿Yu本月底將會去日本大阪拍攝旅遊特輯，從未去過大阪嘅佢話已經準備好晒，阿Yu話：「今次去大阪十日，我諗住帶五萬蚊去買衫掃貨，重會帶個空嘅超大行李箱去。」
