早前Nikon推出嘅DSLR數碼相機（單鏡反光）D100，由於夠晒抵玩而叫好兼叫座，令宿敵Canon急謀推出另一款同級機EOS10D應戰。呢部旗艦級DSLR機並非以高解像戰勝對手，而係以快速反應及輕巧機身兩大重點改良為賣點，未推出已經有好多Fans昅實。同期重有幾款唔同級數嘅型號登場，實行一口氣攻下高、中及低檔市場。
記者、攝影：徐影龍
ImageGirl：Clara
CanonHK 查詢電話：23012468
雖然Canon呢部新機EOS10D跟之前嘅D60同樣採用630萬像素CCD，解像度並未有提升，不過就以高速對焦及機身重新設計為撒手鐧。首先EOS10D以傳統菲林機EOS33為設計藍圖，骨架改以鎂合金質料製造，大幅降低機身重量之餘亦可留有穩重質感，直接加強機動性。
另一重點改良就係對焦及快門反應方面，配合Canon獨有嘅DIGIC影像處理器，以高解像拍攝都有快速反應，呢兩點可謂針對數碼相機不及傳統菲林機而設計。賣價方面比D60更平，極為貼近對手D100，舊有用家最關心嘅，相信係配件升級問題。除可沿用全系列EF鏡頭外，連直立式手柄BG-ED3都支援，相信可吸引唔少人升級新機。
Canon始終一意孤行採用CMOS為感光元件，EOS10D就跟舊機D60一樣採用630萬像素，相片最高解像度達3,072×2,048。其他改動方面，對焦系統採用七點自動式對焦或自選對焦點，快門速度為3至1/4,000秒，而操作上亦跟D60般放棄十字掣而採用圓盤式設計，較大改動係屏幕顯示質素，過往劣評如潮嘅LCD亦有所改進，預覽相片變得清晰明亮。EOS10D亦加入像G3嘅影像處理器DIGIC，能加快影像處理速度（壓縮及儲存），連環快拍最高可達9張（每秒3張），另外亦可提高曝光及顏色質素，令相片表現更為優越。
新機試影：未知是否CMOS及Canon鏡頭一貫嘅特性，相片亦是畀人一種較柔和嘅感覺，不過操作方面真係無話可說，充滿爽快感外機身亦唔算太重，值得一讚。
最後係屬中價級數嘅S50，配備500萬像素CCD，相片最高解像度為2,592×1,944。除9點自動對焦外，亦可自選對焦點，大玩景深效果，適合進階用家。其他功能如三倍光學變焦、1/2,000快門速度及F2.8最大光圈等只算中價機嘅標準，反而要彈係感光速度只得ISO400，陰暗環境拍攝較有難度。Canon眼見之前嘅黑金剛限量版G3賣到斷晒市，今次再下一城，同期推出銀色普通版及黑色限量版S50，幸好兩者賣價亦係一樣，對黑色機情有獨鍾嘅用家要快手。
新機試影：相片表現不俗，人物膚色自然，500萬像素方便輸出或列印大海報。不過以中價級計機能未算突出，尤其係不設熱靴接駁閃燈，嚴格嚟講只算一部高質素嘅入門機。
至於目前市場最大嘅入門級機種，Canon則以PowerShotA60及A70迎戰。新機A70除配備2002年登場嘅DIGIC影像處理器外，重針對入門用家開發iSAPS智能場景分析系統，令唔同環境拍攝都可有滿意相片。新機另一大特色係如SONYU20般玩顏色，配以唔同顏色嘅手柄，其中A70嘅黃色手柄更屬限量特別版，不過價錢一樣為$2,480。至於另一部A60大致上跟A70差不多，不過就採用較低階嘅200萬像素CCD，具有三倍光學變焦，賣價$2,000有找亦算抵玩。
新機試影：以入門級機嚟計A70表現已算令人滿意，尤其係身處變化多端嘅拍攝環境，新手都唔怕影到手忙腳亂。而200萬像素嘅A60除輸出尺寸較細外，相片質素並無太大分別。