八方噚日喺科技大學一個活動見到校長朱經武，只見佢九一分界嘅頭髮下，額頭中間有笪深色大疤痕，四圍重粒粒細點，一問之下，原來係同最近令人聞之色變嘅肺炎有關！
不過大家放心，朱校長並冇染上非典型肺炎。反之，佢話自己「有先見之明」，早幾個星期前去咗打肺炎疫苗針，不過可能係因為啲疫苗將潛伏喺朱校長身體內嘅水痘病毒引發埋出嚟，加上身體抗體唔夠，搞到發疱疹。朱校長話，之前隻眼腫晒，𠵱家已經好番好多，淨係得番個「印堂發黑」。
之後記者不斷追問朱校長科大俾人減資助嘅睇法，校長當然表示好懊惱，話有好多嘢要考慮。跟住佢又忍唔住講，個疱疹可能都同減資助有關，因為醫生話壓力大都會引起疱疹喎。
減資助事在必行，而且重有排搞，咁容乜易康復無期？八方喺呢度祝朱校長快啲好番啦！
傳真︰2623-9278
電郵︰