雖然德國球隊響今屆歐洲賽全軍覆沒，不過多蒙特前日對AC米蘭鬥到最後一刻贏埋波，就將日耳曼民族嗰份做事認真、講求紀律同埋永不言敗嘅性格發揮得淋漓盡致，就算最後出唔到線都贏得唔少掌聲，好嘢！
前日多蒙特要作客贏AC之餘，重要寄望皇家馬德里同時間失分畀火車頭。我諗多蒙特球員踢到咁上下時間，唔多唔少知道皇馬已經領先，換轉其他球隊可能會戰意鬆懈；但係多蒙特就無咁樣，繼續爭勝寄望奇迹出現，終於響完場前十分鐘由真高拿入波奠勝，出局都無丟架。
講番AC，我求大俠已經唔係第一次講列當度一踢正選，隊波就輸波或者輸盤，估唔到前日又再應驗，唔通佢真係邪星？
今季韋斯咸戰績唔好，又經常傳出將帥不和事件，你話啲球員踢得開心就假嘅，我求大俠就睇死無論隊波最後使唔使降班，到季尾陣中名將都會作鳥獸散。領隊羅達好明顯睇到呢個問題，最近積極進行挽留主力大行動，例如日前宣布來季委任中場祖高爾做隊長。不過隊波本來已經唔吸引，如果降埋班個隊長搵你做咩？
法蘭西大軍主帥辛天尼公布嘅最新國家隊名單，並無迪西里同埋比堤呢兩個老將份。雖則辛天尼就解釋佢哋兩個落選，係因為有啲傷或者傷完狀態未十足，不過係人都知辛天尼想乘機畀多啲年輕球員落場，為明年歐洲國家盃甚至三年後世界盃鋪路。講真，佢兩個都唔後生，又不復當年勇，都差唔多係時候嘞……
早幾日舒利亞一句「有能力貢獻國家隊」，唔止玩謝傳媒同埋英格蘭領隊艾歷臣，最「甘」都係搞到紐卡素領隊卜比笠臣虛驚一場。卜比笠臣前日就講番當日知道老舒可能復出國際賽後，個心都涼咗半截，擔心影響到紐記成績同埋老舒自己嘅健康，後嚟知道係流料至安樂番。老人家唔嚇得，舒利亞以後都係慎言好啲。
中國籃球明星姚明效力嘅火箭隊教練湯贊奴域，剛剛證實患上膀胱癌，雖然暫時唔使做手術，但就要化療，幾時歸隊都未知。呢個不幸消息對爭崩頭入季後賽嘅火箭真係嚴重打擊，因為火箭以年輕球員為骨幹，突然冇咗主帥督軍，話冇影響就假。但我求大俠就希望班後生仔，會為咗唔使激親教練而打得好好睇睇啦！
逢周一至周五見報