窩輪市場可能從未出現過昨日咁嘅情形。恒指升117點，計埋滙控（005）除息因素，實際升200點左右。以前都唔係未試過恒指升200點，但窩輪變化，就算喺97年瘋狂時期，都冇咁厲害。升幅40%嘅窩輪，咪話可以打入10大威水榜，連40大都唔能夠打入。
頭10位，升幅最少都有108%，最大嗰件升夠280%，頭50位，最細升幅都有38%。今回，Call輪揸家大報復。槓桿率幾十倍嘅，升幅閒閒哋就係幾十巴仙。
兩日合計，中移動（941）升1.45元，長實（001）升3.9元，和黃（013）升3.5元，聯通（762）升55仙，平均都成十個巴仙，高價追買佢哋啲Call輪，恐怕水位有限。搵Call輪買，都係先揀啲升幅唔算大嘅藍籌，再揀輪，又或者等藍籌回落至考慮。
九倉（004）近幾日升得慢啲，諗吓九倉Call輪9476，6月到期，現價26.5仙，負溢價2.5%，槓桿率6.4倍。免溢價係預咗會派高息（末期息）。
華創（291）近期升幅亦唔大，揸華創Call輪9270相對風險亦較細。隻輪9月到期，現價5.5仙，溢價8.7%，槓桿率11.7倍。
大市若再升，可考慮反手揸恒指Put輪，對象可考慮9619。
章盛