梁珮瑚昨日往銅鑼灣出席慧妍雅集舉行的記者會時，否認她懷孕四個月的報道。她表示要應付考試，體重暴增至一百二十多磅。但見她腹部的確隆起，腿部又粗，十足十大肚婆。
慧妍雅集一眾成員包括吳婉芳、梁珮瑚、向海嵐及陳法蓉等，昨日往銅鑼灣世貿中心TonyRoma餐廳，出席「慧妍美麗人生2003慈善餐舞會」記者會。
昨日有報道圖文並茂指梁珮瑚身形暴脹，懷孕四個月，昨日現身記者會的她否認懷孕一事，於香港大學修讀法律課程的她說：「我呢排掛住讀書，冇時間做運動，的確係肥咗好多。𠵱家我體重一百二十幾磅，我冇諗住減肥，慈善舞會舉行時我可以着衫遮吓啩。」
梁珮瑚續說：「話我懷孕嘅報道出街後，我同男友收到好多恭喜電話，男友啲朋友send晒短訊恭喜佢就快為人父，梁芷珊又打電話畀我，問我係咪真係有咗，搞到我同男友都啼笑皆非。」
問梁珮瑚其男友有否暗示要她減肥？她說：「鍾意一個人唔係淨係睇外表嘅。」她透露與圈外男友已拍拖九個月，她形容對方是「普通嘅中年男人」，並指對方曾向她求婚，她說：「我都想結婚，不過重要觀察吓佢（指男友）。」
此外，昨日以低胸裙出現的陳法蓉表示最近十分煩惱，因為連續三天收到郵寄信件，內容是向她求婚。她表示最大的驚恐來自對方竟然知道她的住址，她說：「係男人大丈夫就唔應該偷偷摸摸，佢連我屋企地址都知，我最驚就係影響到家人。」問她這個向她求婚的神秘人會否是曾對她表示好感的張錦程？她說：「一定唔會啦，我哋係好好朋友嚟㗎。」
採訪、攝影：JessicaNgan
