港股噚日出現大挾倉，恒指低見8913後，反彈至高位9198，波幅達285點，收報9158，升117點，成交逾90億元。期指更於滙控（005）除息後轉呈高水，收報9162，升227點，高水4點。滙控收報83.50元，升1.87%，成交逾10億元。
長實（001）及和黃（013）股價急升6%，市場傳出長實及和黃業績較市場預期為佳，此外更傳出李嘉誠將於長和公布業績後，再度出手增持，令一眾投資銀行入市吸納長和平淡倉。嘩！理由真係好牽強。
港股最令人驚喜係投資者開始積極吸納地產、銀行及電訊股，似乎大市真係有轉勢迹象。唔通市場真係認為美伊打完仗之後再冇壞消息困擾？
金英控股（727）大股東洽售股權交易告吹，股價反而彈升9%，收報3.275元。Cookie話，交易告吹主要是因為大股東叫價頗高，買家唔肯應承。
大股東叫價咁硬，相信可能同公司業績表現不俗有關，金英中期業績連同特殊收益，純利大升7.6倍，每股盈利2.70元，但只派2仙中期息，若果下半年業績唔太差，金英末期可能會派特別股息，然後再傾賣盤事宜。
國潤（175）配股後復牌，股價噚日上升3.6%，收報0.58元。黑客話，國潤今次計配售最多1億股，每股作價0.55元，集資5500萬元，主要用作在國內成立汽車合營企業。
據聞今次國潤配股，大部份配畀中資友好人士，冇乜貨流出街。據講，噚日有逾7000萬股冇經市場直接上板，部份則直接在市場沽出，並由炒家接晒，後市估計會再炒一轉。
阿虎