唔少明星利用自己做生招牌搞生意，女嘅可能開美容院，男嘅就進軍飲食業，挾住明星效應，大展鴻圖！拍咗一系列《表姐》電影嘅導演張堅庭，舊年年中開咗第一間「表哥粥麵」茶餐廳後，三個月後就開第二間，諗唔到半年後，已開到第三間，真係可喜可賀。
華匯物業報料，尖沙嘴漆咸道南六十七至七十一號地下C舖及閣樓，地舖面積二千二百呎，閣樓三千呎，以每月十五萬元租出，新租客就係表哥粥麵。
張堅庭開嘅第一間茶餐廳，坐落喺灣仔莊士敦道，有二千七百呎，每月租金十萬，第二間喺明星最愛蒲嘅跑馬地，𠵱家業務更進一步拓展到對面海尖沙嘴。經濟唔好，但係張導演可以不停擴張佢嘅飲食生意，好可能同佢以前做訪問時講，經營茶餐廳要：「酒店式服務、西餐廳裝修、茶餐廳式收費。」有密切關係。
近年幾間代理行互相兼併後，時有聽聞分區阿頭過檔姊妹公司嘅情況。利嘉閣東九龍區域經理一職，終於搵到掌門人，就係前中原將軍澳高級分區經理楊淑美。
先前利嘉閣將東九龍同紅磡區歸併為一個大區，畢竟範圍太大，𠵱家利嘉閣開多咗分行，人手無咁緊張，加上有施老闆手下大班員工做後盾，分工可以仔細啲。
另外，中原中半山區域經理林劍鳴Jimmy喺幾個禮拜前辭職，呢位老將，喺中原做咗十六七年，有消息話佢會去姊妹公司利嘉閣，不過利嘉閣高層已經否認。中原陳華勝話，暫時唔會搵人代Jimmy個位。
香港人呢排俾非典型肺炎、美伊戰事，搞到心情麻麻。但一向樂觀嘅長實趙國雄，就認為本港近期爆發嘅非典型肺炎，唔會影響本港商業同經濟活動，亦唔會拖累佢哋推銷樓盤嘅活動。
同時，特別喜歡擺甫士影相嘅佢，噚日現身尖沙嘴凱帆軒全新示範單位，就即時放下鑊鏟，唔整佢拿手嘅炒飯，改揸槍扮特務占士邦007，重出動埋私家黑超，又話本嚟想換埋示範單位內嗰套踢死兔出嚟見大家，但係唔夠時間。似乎心情好靚喎。
美國就嚟開入伊拉克，香港雖然離中東冇雷公咁遠，但係咁嘅國際大事，多少會對香港有影響。
向來反應過敏嘅地產市場，可能有唔尋常變化，為咗掌握第一手資訊，美聯物業今日成立戰事地產資訊中心，由公關及研究部員工當值，專門接收地區分行喺戰事前後嘅成交報料，同埋業主買家反應。為咗統一處理，噚日將中環總部其中一個會議室改作資訊指揮中心。唔知使唔使二十四小時輪班呢？
之前中原老施（施永青）話，今時今日代理好難做，佣金水平比好多地方都低，所以應該增加收佣嘅巴仙。點知噚日就有佢嘅行家鄒偉霖，批評老施嘅言論唔知係唔係別有用心。
鄒生話，呢幾年好多中型地產代理關門大吉，或被吞併而消失咗，𠵱家形勢已經係雙寡頭壟斷，行頭窄咗，人工又減咗，而且目前代理所提供服務水準，根本就唔值收一個巴仙佣，佢質疑提高佣金巴仙，唔知係唔係為增加公司利潤而提出。
皇崗口岸二十四小時通關後，內地樓盤多咗個賣點，地產商自然會加以利用。
東莞塘廈嘅駿景高爾夫花園，就開咗條二十四小時住客專車線，往返皇崗口岸，好識搞噱頭。
一般嚟講，由塘廈到深圳車程唔超過一個鐘，如果有心趁假期返大陸度假，又怕羅湖過關太多人，可以考慮半夜經落馬洲過關入皇崗，跟住坐住客專車返屋企，既慳時間，又舒服。
蘭西
電郵地址：
