香港近年來，好似發咗瘟，雞禽流感已經麻煩，𠵱家整多樣非典型肺炎，WHO重竟然為之定名為SevereAcuteRespiratorySyndrome（簡稱SARS）（嚴重急性呼吸綜合症），真係撞鬼。香港特別行政區名字HongKongSAR，以後香港非典型肺炎就叫HongKongSARS？真真破壞香港形象！
成班金融界老友坐埋一齊食飯，講起HKSAR，都為之擰擰頭，公子L兩星期前坐長程機返港，鄰座乘客咳足全程，公子L返到嚟就有輕微感冒兼夾咳。嘩，一聽到啫，我哋幾乎要立即彈起三呎以外，好彩公子L話延醫診治兩星期，已經冇事，大家都放心啲。
公子L話離開兩星期，阿松哥已經搞到不似人形，以後SAR（特別行政區）怎麼辦？經紀K話神童鄺離開聯交所，返政府做財爺最啱。賓架C話只怕時亨哥唔制噃，如果搵另一位退休人士肥仔許重正，肥仔許隻馬「有聲有色」今季表現甚佳，肥仔許做財爺，擔保有聲有色，起碼當奴蛇與約瑟任全力支持，組成鐵三角護衞港元。
經濟師K則話呢兩位仁兄回朝，屬於政治不正確，佢哋是但一位做財爺，就可能俾民眾誤解公務員好叻，商界精英唔掂，特首點會甘心。照佢所知，畢馬威資深合夥人張建東下個月就滿五十五歲退休，Marvin二十九歲就做畢記拍乸，會計師之中公認叻人，適逢精壯之年，按會計師行傳統退休，兼且屋企大把，人工冇計，如特首能徵召之，乃香港之福。成班友講到好似阿松會唔撈咁款，SAR綜合症？何其多也。