明明美伊就快開戰，但噚日期指大挾淡倉，好幾隻大藍籌係咁狂升，真係玩嘢之道都莫過於此。由於個市實在太靚仔，搞到好多三四線股都忍唔住蠢蠢欲動。
上個月先至批股集資嘅亨泰消費品（197），將於下周四公布中期業績，噚日成班炒家大力炒上，急升8.6%，收0.63元，升回批股價樓上，成交亦增至669萬元。
亨泰今年1月由0.40至0.50元起步，最高炒過上去0.70元，然後在上個月以0.59元配售1億股，集資淨額5550萬元。
公司舊年全年盈利升22%至3840萬元，今次中期業績有冇咁好環境？經紀陳就話唔知，皆因上市無耐嘅新股，業績通常唔太差，但上市超過1年嘅亨泰，佢就唔敢講，但佢話知道上次配股接貨嘅炒家，好多都未出晒貨，可能趁今次公布業績炒一轉。
不過，亨泰噚日升得急，所以經紀陳建議，等股價回一回，先至考慮上唔上車。
慕容小初