大市升勢未止。噚日早上，因滙控（005）除息，恒指曾一度跌逾百點，但之後已跌唔落，且見有大行不斷低吸大藍籌，午後氣氛轉醒，大市升勢一發難收，特別係期指，由大低水變為高水，一度挾升逾300點。結果恒指收9158，再升117點，期指則收9162，輕微高水4點，成交大增至90億元。
大市升勢之勁，出乎市場意料之外，市場看淡者太多，每有反向走勢出現，現時恒指已升破10日線同20日線，且有大成交支持，照計重有得去，但升到呢個水平，個人對後市升勢已有保留，中期下降軌同50日線（約在9300點水平）阻力非輕，不易衝破。
雖然大市上升水位已唔多，但相信旺市仍可持續到月底。高人話過，舊曆正月同2月都係反覆市，雖然早幾日恒指曾一度跌穿8772咁重要嘅低位，但大市並未如市場所料的破位而落，反而瞬即又彈番上去，噚日最高更去到9200點水平，大市果如所言的反反覆覆，真係唔到你唔服。正月同2月測得咁準，3月同4月話到明係跌市，大家真係要萬二分小心。
大市反彈，藍籌先行一步，估計未來呢一兩個禮拜，會由國企同三四線股接力而上，噚日國企已有蠢動之勢，南方航空（1055）同上海石化（338）都入50大升幅之列；南航收2.15元，升6.1%；上海石化收1.25元，升7仙，升幅5.9%。
上海石化打出宣布業績日期（本月26日）後，股價立即有脫胎換骨表現，掃上1.25元高收，成交更大增至約4800萬股。呢一隻早輪俾大行沽到殘嘅石化股，噚日開始轉勢，唔單止升破下降軌，重上番10日線（1.17元）同20日線（1.23元）之上，圖表亦出現入貨訊號，若果業績對辦，上海石化股價有望重上1.47元的高位。
美伊開戰在即，油價急升後已回落，雖然油價高企時曾影響石化股表現，但行業進入上升周期的大形勢，未有因而改變，化工股在未來兩年會穩定復甦，上海石化去年首3季盈利為4.87億元人民幣，估計全年達6.8億元人民幣，大升4.86倍，今年業績料會更上層樓，以預期PE10倍計，股價今年內可見1.6元。
郭兆誠