自從財爺宣布大幅度增加汽車首次登記稅後，本地汽車業前景可謂一蹶不振，而新車買賣亦幾乎陷於停頓，皆因全個汽車業不論代理商，又或者係獨立入口車行，都要重新釐定新車價錢嘛！你話財爺呢招係咪百害而無一利呢？重話想多收7億稅項？睇嚟真係難過登天喇！再者，就連貴價車前景亦不敢樂觀，例如亞Mark早前提及過，好似賓利部ContinentalGT咁，原先預售價係200萬之內，家陣就要成330萬上落；而城中富豪焦點嘅平治Maybach，亦分分鐘要加價至600萬以上。但凡事又未必係絕對，就好似越野路華部頂級RangeRover咁，加稅前車價都經已要成接近一百萬，及後財爺預算案一出，車價就急升至接近130萬，亞Mark重以為班準買家會打退堂鼓，殊不知竟有忠實嘅Fans去落定，兼且重唔係一部咁少㖭！