所謂「有諸於內，形諸於外」，列斯前鋒阿倫史密夫最近表現跌晒Watt，原來係同佢對球隊心淡有關，佢喺日前接受英國報紙訪問時，重話喺列斯浪費咗黃金四年，連主力都咁講，列斯今次真係危矣！
列斯目前喺聯賽榜得三十四分排十五位，即係倒數第五，球星又買少見少，同列斯續咗約冇耐嘅阿倫史密夫就忍唔住話：「我以為今屆我哋會有所作為，點知原來係四年嚟最差嘅一屆，球星走嘅走，眼白白睇住呢三、四年建立嘅嘢毀於一旦，你話唔心淡就假嘅！」
而喺季初被列斯炒魷嘅前領隊奧拉利更喺呢個時候伸球隊一腳，佢好風涼咁話自己帶隊嗰時球隊都冇咁差，如果有乜需要幫手，叫列斯隨時開聲！咁都得？
曼聯領隊費格遜同埋阿仙奴領隊雲格，堂堂兩個大男人，加埋重要有百二歲，但近日為咗爭做超聯一哥而你鬧我、我鬧你，真係令我求大俠覺得好煩。所謂「講多無謂，行動最實際」，佢哋兩隊會喺下個月十五號嚟一次超聯生死大戰，到時邊個贏邊個咪做英雄囉，唔該咪再日日喺度潑婦罵街！
呢個世界真係無奇不有，布力般喺上個禮拜六贏咗阿仙奴後，佢哋隊長費歷哥夫就猛讚一個人，不過唔係入球功臣杜夫或者領隊桑拿士，而係曼聯領隊費格遜！佢話多得費格遜喺賽前某份報紙嘅專欄中大讚布力般，令佢哋有信心打贏「兵工廠」。費歷哥夫咁擦費Sir鞋，唔通想博轉會？
迪肯尼奧同韋斯咸就搞到好唔愉快，但另一名喺英格蘭搵食嘅意大利前鋒拉雲拿利就不知同甲組打比郡關係幾好，佢重話雖然自己季尾就會同打比郡滿約，不過如果打比郡需要佢嘅話，佢唔介意下屆免費幫打比郡踢波。佢話：「錢並唔重要，最重要係有波踢，加上我家人喺打比郡都安頓晒，我哋根本唔想走！」
NBA騎士隊嘅主力域奇戴維斯喺前日大炒爵士嗰場波，為咗攞個人職業生涯首個三雙成績，竟然將球專登射失而搶籃板「湊夠數」，佢呢次行為結果唔能夠得逞（因為計錯數），又惹嚟被指自私嘅批評。但我求大俠認為，既然球隊出線季後賽冇望，球員以成績提升自己嘅身價都好自然啫，其實NBA裏面呢啲情況都好平常，只不過無域奇戴維斯咁核突啫！