美股勁升，港股當然趁勢大挾淡倉，恒指突破9000關口，收報9041，升237點，成交增至63.44億元。唔通市場真係對打仗消息完全消化？不過，布殊今次趕狗入窮巷，侯賽因若真的到處出動生化武器，唔知到時市場又點睇呢？到時嘅情況可能較911世貿大廈遇襲時更壞。
中移動（941）首度派息0.32元，派息比率達20%，比市場平均預期為佳，股價隨即上升6.7%，收16.75元，成交達5.78億元。另外，中移動新收購八省市業務盈利又較收購時預期為高，加上管理層話明若股價唔合理，將回購股份，搞到唔少投資銀行要入市補倉。
不過黑客話，要留意公司董事局可能有變動，雖則王曉初仍保留董事長一職，不過母公司派3名要員入董事局，唔知會否被市場理解為王曉初被削權呢？早前傳過王曉初會被調走及中移動會用國產制式發展3G，其後中移動即遭拋售。
新醫藥（8085）噚日升31%，收報0.05元。莫非公司發明可以治療SARS新藥物？當然唔係，據聞新醫藥好似搵到一戶好人家，炒賣盤就真。
亞洲鋁業（930）中期盈利勁升84%至1.78億元，成績叫做有交代，但股價只升1.2%，收報0.83元，成交則增加至1940萬元。
市傳噚日有基金捧亞鋁場，但同時亦有大戶趁機出貨。據聞大戶於0.60元水平開始收集，平均收集價在0.65至0.70元左右，於0.80元附近沽出其實所賺唔多，至於點解咁快沽出就不得而知，但今次亞鋁中期盈利勁升，主要因為獲得5200萬元特殊收益，並非年年都有。不過Cookie話，今次接貨者實力都唔弱，可能未炒完。
阿虎