非典型肺炎蔓延全球，市民出街都要戴口罩，無乜必要都唔會出席人多嘅聚會。噚日美聯物業主席黃建業，頒獎畀集團三十周年逍遙大抽獎加勒比海郵輪之旅幸運兒，佢因為患咗感冒，怕傳染畀記者，主動與記者保持三呎距離，只係回答咗一條簡單嘅問題，就急急腳走人，臨走前好肯定咁話，自己患嘅唔係非典型肺炎喎！
美伊好快就會開戰，蘭西見到黃建業即時問吓佢，打仗對樓市有乜影響？
佢話短期內會有啲影響，但覺得感冒更加緊要！事關佢同屋企人都身受其害。首先個囡囡喺學校惹到感冒，然後傳咗畀阿媽，最後輪到佢中招。
雖然病咗，但係黃老闆仍然好風趣幽默，話唔係患咗非典型肺炎，因為囡囡已經好番，老婆都啱啱好番，相信自己亦唔會病好耐。
令太古及新地勁蝕，要多次作出大幅撥備嘅將軍澳維景灣畔，早前被政府追收因股權轉移而要繳交嘅三億四印花稅。日前發展商上訴得直，上訴法院提出可豁免收此項印花稅。
不過，太古噚日就即刻出稿，話考慮到政府或會就今次判決提出上訴，所以佢哋公司唔會喺司法程序完成之前，回撥該筆本來已作印花稅撥備嘅一億七千五百萬元。太古今次反應咁快，睇嚟好似對單case都未有十足贏面。
上海樓市熱騰騰，十足十以前嘅香港。社會上搵錢機會多的是，樓房好賣，投資氣氛濃，例如豪宅世茂濱江花園，租金回報理想，中原中國提供嘅資料話，上年十二月落成入伙嘅世茂濱江花園二號樓，幾個單位租出，回報率都有十一厘，其中一個高層A室，三千三百六十九方呎，年租金達五十萬人民幣，回報率高達十二厘。
另外，物業嘅主題式園林景區亦陸續落成，蘇州園林正是其一，最大特色係開咗一間著名上海菜館，喺香港都有開分店嘅小南國，特別之處係會提供喺全國其他小南國分店都食唔到嘅獨家菜式。
𠵱家推出招租嘅「海上世界」，與鄧小平及戴高樂甚有淵源。本來係一艘法國建造嘅豪華郵輪，1962年建成，由當年法國總統戴高樂剪綵，成為佢嘅專用郵輪。
中國喺1973年買咗艘船，改名「明華」，79年廖承志率團乘坐「明華」訪日，該船曾被譽為「中日友好船」。83年停泊喺深圳蛇口海岸六灣，內部改為酒店、娛樂等用途，成為中國第一座海上旅遊中心。84年鄧小平南巡時，亦曾經喺明華輪住過，而「海上世界」正是小平同志嘅題詞。
據講，船上鄧小平同戴高樂瞓過嘅房，𠵱家重保留住。
蘭西
電郵地址：
