每次問深圳的朋友，哪裏的食肆富風味又熱鬧，食物又平又好食，佢哋十個有九個都會向我推介向西村。有晚我終於去咗實地考察，果然無講錯，成條街開滿食肆，雞煲、豬骨煲，湘、粵小菜、海鮮、重慶辣菜乜都有得食，最犀利係間間都客似雲來，而且愈夜愈旺場，絕對啱晒我呢啲夜鬼！
記者：黃希知
攝影：陳良
入夜後的向西村即刻熱鬧晒，行過就有一大班人蜂擁而至，大叫「食晚飯呢邊，食晚飯入面坐呀老細」，拉客聲此起彼落，愈夜愈精采！
雖然叫重慶火鍋，但其實豬骨煲同雞煲先係主打，拍攝當日並非假期，但六層都座無虛席，差不多每圍枱都食住熱辣辣嘅煲，熱辣辣加鬧哄哄，好有氣氛！
這裏的雞煲足足賣了九年，難怪店內十枱有九枱都有一煲在枱，雞煲有何魅力？大廚賀師傅話，只會選用湛江的家雞，貪其肉質嫩滑雞味濃，而另一秘密武器就是他自己研製的秘方醬汁，亦是令整個雞煲與別不同的地方。醬汁用上十八種不同材料調校，連同其他配料如葱、薑、辣椒等用砂煲煮，熱力透過砂煲將雞肉味和精華慢慢逼出，醬汁滲入雞肉，雞肉滲滿香濃汁味，邊滾邊食，夠晒惹味。
近排香港突然興起食豬骨煲，其實深圳人一早就開始食。一個細煲份量唔少，豬骨堆到成座山咁高，抵食過香港。大廚專揀童子骨（即豬仔大腿骨），再加入十多種材料熬五個鐘製成，熬出來的湯不油不膩，不少客人更落手落腳捧住一大嚿豬骨用飲管慢慢啜，品嘗豬骨內嘅湯汁同骨髓，湯底更可用來灼菜，一啲都唔嘥！
在眾多煲中，啤酒鴨煲最特別，熱辣辣上枱，未食已聞到陣陣啤酒香，用特醇靚啤酒加埋泡椒、花椒同辣椒一齊煮，將辣味同酒味共冶一煲，清淡啤酒味同鴨味配合得宜，香濃中帶微辣，味道有特色。
九年前，賀師傅已經喺度煮自創嘅雞煲，由一間舖煮到變成三間。「我見當時深圳食店只有小炒，所以就諗出砂煲菜。當時我就研製咗雞煲醬汁，推出咗半年就為人熟悉。」到現時為止，只有佢知道醬汁配方點做。會否將秘方傳畀其他師傅？「我諗我唔會啦！」
店名：渝君重慶火鍋
電話：(86)75582182342
地址：深圳市向西村嘉賓路1012號
營業時間：上午10時至凌晨5時30分
金錢蛋餅係師傅啱啱新推出嘅湘菜，雖然簡單，但做法好特別。將烚雞蛋弄成一片片再蘸上麵粉煎至外層金黃香脆，就好似一個個金錢一樣，蛋面再鋪上炒香嘅韭菜粒，蛋餅有韭菜香吊味，烚雞蛋炸過後入口香口，內裏軟滑，蛋味夾着韭菜香，味道特別。
油鱔其實係鱔嘅一種，但比較罕有，一般可以喺大海捕捉，但貨源有限，未炸之前嘅油鱔十足一條條黑色嘅蚯蚓，但蘸粉炸過再用椒鹽炒香之後，又不期然被其椒鹽香味吸引住，油鱔已經炸到脆卜卜，同白飯魚一樣可以連骨食，咬落又香又脆，送酒一流。
炒海鮮至掂！
港客梁生：「佢哋啲小菜做得唔錯，好似乾炒牛河同炒海鮮都做得幾好，新鮮乾淨，價錢合理。」
店名：莊家莊海鮮野味火鍋
電話：(86)75582170710
地址：深圳向西村嘉賓路1002號
營業時間：24小時營業
重慶烏江魚食得多，嘉陵江血魚就第一次見，呢種魚屬野生魚，產自嘉陵江，特點係肉滑細嫩，味道鮮甜，起骨後配以四川乾辣椒煮，同烏江魚一樣，成盆魚浸喺血紅色嘅辣汁裏面，面頭鋪滿花生同乾辣椒，辣味可想而知，客人可以揀小辣、中辣同麻辣程度。食前要搞清楚自己嘅受辣程度先好叫，否則後果自負。
大廚話香港客最鍾意叫呢款泡椒墨魚仔，用泡椒加泡薑以慢火炒製，以細火將泡椒嘅辣味炒出來，辣味同墨魚仔鮮味配合得宜，墨魚仔爽口鮮味，一啖一隻，不知不覺食好多！
食客點睇：
胡小姐：「我好鍾意食辣，每次來都會叫一、兩款泡椒菜式，最喜歡食這裏的泡椒雞雜，辣味調校得宜又正宗。」
店名：巴蜀火鍋城
電話：(86)75582233163
地址：深圳向西村嘉賓路1002號
營業時間：上午10時至凌晨5時30分