方中信同舊愛陳淑蘭（蘭子）都係卓悅彩光美容嘅代言人，方中信前日四十歲生日，佢哋前晚喺尖沙嘴出席卓悅集團嘅春節晚宴，順便同「壽星仔」方中信慶祝生日。
蘭子傍住方中信切三層嘅生日蛋糕嗰陣，佢哋兩個好似新娘同新郎切結婚蛋糕一樣，蘭子重向方中信獻上birthdaykiss。
蘭子錫完方中信之後，因為記者影唔切相，蘭子又應要求再錫多舊愛兩啖。蘭子重話要祝方中信快啲結婚，連生貴子，老婆仔生完BB後可以幫襯卓悅收身咁話。
蘭子話：「我呢個祝福係出自真心。」蘭子以前曾跟方中信女友 唔妥，兩個女人亦曾公開罵戰，蘭子話：「人大個咗，世事冇絕對嘅。」
問方中信俾蘭子錫面珠，唔驚莫可欣呷醋咩？佢話：「我都係嚟做嘢啫，我同女友之前都一齊慶祝咗生日，佢送咗個LV旅行袋畀我，我好開心，我試過醉酒同女友求婚，但我事後就唔認數。」
採訪：駱華齡 攝影：陳慧安
林嘉欣噚日喺台灣擔任鑽石諮詢中心代言人，着住吊帶裙嘅嘉欣戴住鑽石鏈出場，非常搶鏡，重充滿女人味。有傳林嘉欣介入劉燁同女友嘅感情，導致二人分手，嘉欣以國語話：「他們的感情事與我沒有關係，最初拍戲是對劉燁有感覺，但時間長了，感覺就沒有那麼強烈。」
許志安同何韻詩噚日出席商台「903idclub拉闊音樂會」記者會，佢哋呢對梅艷芳嘅入室弟子，將會喺下月十四日首次喺舞台上合作，不過佢哋噚日就喺記者會上互讚，何韻詩話最欣賞安仔條泳褲，搞到安仔唔知好嬲定好笑。
老牌歌后靜婷、吳鶯音同江華，喺下月二十五同二十六日，喺紅館舉行兩場「靜婷金禧演唱會」。噚日成班人喺中環陸羽茶室舉行記招，其間「中環洪金寶」曾治平走咗入嚟，重企喺靜婷身邊唱歌，之後重用國語同佢講：「你真美麗。」真係俾佢嚇一跳。
莫文蔚噚日去屯門，出席「捐血助人愛心大行動」，佢同一班好可愛嘅小朋友齊齊呼籲市民捐血。對於張堅庭批評好友梁詠琪嘅歌藝，莫文蔚話：「係咩？咁得意？講笑啫。我自己親眼睇過個騷，感覺同氣氛都好好，比上一次演唱會有好大進步。平時GiGi實在太忙，搞到個人好緊張。」
踏入樂壇二十年嘅Beyond將會喺五月二日至四日喺紅館開三場演唱會，主辦人丘亞葵噚日宣布加開五月一日一場，即係總共開四場。丘亞葵重話，Beyond三子隔咁耐冇一齊開演唱會，今次佢哋有好多諗頭，好似佢哋想同歌迷近距離接觸，所以想喺觀眾席搭多個台仔，但咁樣會冇咗九十八個位，一場唔見差唔多四萬蚊，四場就冇咗十六萬，咁搞法實超支啦！
