正如董太自己話齋，佢真係永遠「出語驚人」，令人一定有驚喜。
港台普通話台噚日播出特首夫人喺《南北樂逍遙》節目中嘅訪問，講社會道德教育，八方滿以為董太嘅普通話好了得，於是坐喺收音機旁邊洗耳恭聽，點知A1一開聲就問主持人「我可以用廣東話嗎？」邊個敢話唔得呀。講真，董太用廣東話講嘢，又真係特別感情豐富嘅。
特別係佢被問到香港德育發展夠唔夠嘅時候，呢位德育關注小組名譽顧問竟然話佢認為「好嘅嘢永遠唔夠。」又拉長聲調話現時距離目標「太……遠喇！」。
雖然董太口口聲聲要做個好榜樣，佢又自打嘴巴，話自己係一個絕對失敗嘅母親同祖母。何解？因為佢當年日日只識得揸車接送三個細路（子女），佢哋成績唔好，你估邊個喊？咪個補習老師囉，大家梗係覺得好笑，但係原來咁多年嚟董太都好內疚，認為自己冇好似現代母親咁帶個女去學跳舞畫畫。
至於身為祖母，佢更自認唔合格，個女叫佢唔做嘅嘢佢做晒，包括畀糖同雪糕個孫食，佢話冇得改，因為驚個孫唔錫佢喎。咁都得？有時個孫頑皮起嚟佢都會話一兩句，最心痛嘅竟然係阿董爺爺，「佢即刻嚟話我，叫我唔好話佢哋啦。」阿董咁縱啲細路，唔怪得阿松畀佢縱壞啦。難為董太重猛話要提高港人品格，又話香港係要多啲精英，但係「叻而冇人格唔係咁好」喎，真攞景。
傳真︰2623-9278
電郵︰