美伊戰事一觸即發，本港警方早就加派被譽為最具反恐能力嘅飛虎隊同機場特警，喺機場作出戒備，呢兩個部隊最近就舉行內部招募活動，搵新血，重喺最新一期出版嘅《警聲》入面登咗兩張分別以身穿迷彩同成套飛虎隊制服人員手持長槍嘅照片，非常有型，連八方睇到都心郁郁，想報名入伍。
不過，今次招募嘅遴選時間係今年十月，即係話呢班新進飛虎隊同機場特警最快都要明年先至可以執行任務，對𠵱家急需反恐人手來說，可謂遠水不能救近火。
除咗飛虎隊同機場特警外，連交通部都喺《警聲》作出呼籲，叫有意投身做交警嘅警員申請，《警聲》更罕有咁用一版半嘅篇幅去介紹交通警嘅日常工作，連好少曝光嘅「交通部一哥」林善政都粉墨登場，講述交通警工作嘅獨特之處同重要性。
林Sir話，交通警單唔止可以揸住架電單車四圍巡邏，重可以學習操作不同儀器，好似雷射槍等，又可訓練單人匹馬處理緊急事故，晉升機會同其他單位並無分別云云。
（圖）飛虎隊同機場特警喺《警聲》刊登廣告，招募同袍加入。
傳真︰2623-9278
電郵︰