Brabus呢個名字，相信各位平治Fans都唔會感到陌生，事關每部經由佢哋改裝嘅平治汽車，都可稱得上係精心傑作；而本港最近有改裝公司，就改裝咗一部既有型、兼且又跑得嘅平治SLK230，真係好吸引㗎！有興趣嘅車迷，不妨留意吓喇！
記者、攝影：黃凱穎
車輛提供：彥豐汽車（27838782）
從外觀而言，平治SLK本身經已好有跑味，但係呢部落重本激改嘅SLK230就更加吸引，事關佢裝有全車包圍不特止，而且重有四輪Brabus18吋大口徑跑車合金胎軨，望落好有跑車Feel㗎！車廂方面雖然看似沒有多大改動，但大至金屬門檻、手掣桿、跑車腳踏，細至車門門鎖的都改用Brabus金屬製品，真可謂氣派盡現呢！
呢部平治SLK所採用嘅一台2.3公升引擎，馬力輸出有193匹，但經過Brabus嘅K3輕量改裝後，馬力輸出激增至240匹，而呢類只改增壓皮帶軸嘅改裝，相對以增加排氣量來取得更大馬力，會更適合香港路面使用。K3將增壓軸加大後，配合獨特嘅電腦調校、水燃器、Denso銥合金火嘴、K&N風隔同埋Brabus專用排氣系統，即可輸出約29.0kgm扭力，難怪此車0至100公里加速度只需約5秒咁快啦！能有如此表現，絕能令呢部SLK，向上跳升為一台真正富有駕駛樂趣嘅開篷跑車呢！
懸掛系統對Brabus而言，亦係一個重要改裝項目，因為佢哋希望喺改裝後，唔會失去平治汽車本身嘅乘坐舒適性及優秀行車表現；故此Brabus便與德國著名懸掛製造商，合作發展特別嘅懸掛系統，包括短彈簧同吸震筒，從而為用家提供頗佳嘅操控特性。除此之外，呢部改裝Brabus更改用上BlackDiamond嘅高性能透氣煞車碟及迫力皮，從而令制動表現更上一層樓。