經紀K向左丁山投訴「水盡鵝飛」，諗唔到會為自己增值，知道咗「水靜河飛」一語係誤傳，一代傳一代，我哋嘅父執輩亦唔知。好嘞，經紀K學咗嘢，打電話嚟講聲多謝，順便益益左丁山，叫我今晚九點半睇亞視本港台。有乜好睇？阿叔要去馬場噃！經紀K話：「咁你就錄影啦。九點半亞視播映《香港人在故鄉》，專係講『關懷行動』。亞洲電視攝製隊舊年跟『關懷行動』去陝西省富平縣拍攝香港啲骨科創傷專家嘅義務行醫過程，內容十分感人，冇介紹錯嘅。」
「關懷行動」由中大講座教授梁秉中醫生創辦，平時十分低調，由九三年八月開始，每年派醫療隊到中國偏遠、比較貧困嘅地區，為殘疾人士做手術，向當地醫療人員傳授護理傷殘嘅知識，到𠵱家起碼診治咗一萬五千名病人，做咗二千五百次以上手術，搞過七千幾人嘅物理治療。
所有參加醫療隊嘅教授、專家、護理員，全部義務工作，不收一文，犧牲假期，到內地行醫。最與別不同嘅，各位義工，由上到下，都以克己節約為目標，盡量利用當地設施，喺被蚊咬，烏蠅騷擾，汗流浹背嘅情況下為殘疾人士醫治。佢哋嘅經費，全靠有心有力人士支持或市民幾百、一千嘅捐款。呢班無名英雄，到內地發揮香港人最好嘅一面，值得支持，如果你未知道，今晚九點半睇亞視。