前日港股因為驚住美伊就快開戰而急挫，昨日亦係因為可能就快開戰而急彈；同1個消息，市場反應完全唔同。公司業績理想，亦係令個市好番原因。
電訊股前日死死吓，昨日一掃頹風。中移動（941）上晝升70仙，食晏之時派成績表，增長較預期佳，又有息派，下晝升多35仙。
窩輪龍虎榜，中移動Call輪佔咗4件，全部都係7仙以下嘅細價仙輪。要喺呢堆仙輪中搵對象賭，9591比較適合，隻輪5月初夠鐘，現價3.2仙，溢價9.4%，冇其他近期輪咁不切實際，槓桿率52倍好爆炸。賭呢隻輪要預咗可能跌到冇渣。
搵中移動Call輪炒，正路嘅有9768同9754，壽命長好多而溢價又合理，當然槓桿率比較細好多。9768喺9月底到期，現價23.6仙，溢價8.1%，槓桿率7.1倍。9754亦係9月到期，現價18.7仙，溢價9.7%，槓桿率9倍。兩隻輪都係交投暢旺，易買易賣。
和黃（013）係半隻電訊股，彈升1元，收43.80元，估計個勢重有得去，短炒搵Call輪，對象係9666，6月夠鐘，現價14仙，溢價11.6%，槓桿率31.3倍。其次9765，9月到期，現價21.2仙，溢價16.7%，槓桿率20.7倍。
章盛