酒樓餐廳嘅廚房，至今仍然可以講話係全男人嘅世界，小記在過往的食店訪問中，發現十居其九（甚至十）嘅大廚師都係全男班。最近去中環一間韓國料理Mr.Kim，赫然發現大廚竟然係一位韓籍靚女札智仙，訪問之下，佢話韓國人仍然有重男輕女嘅傳統，所以佢決定來港闖一闖，結果當然是一登鳳門升價十倍！
記者：朱崇德 攝影：陳偉強
提起韓國菜，相信好多人都會同小記一樣孤陋寡聞，只會聯想到火鍋一類食品，將小記帶進韓國菜的殿堂，是一位韓籍的靚女行政總廚－－－札智仙Janet，「韓國菜當然唔止火鍋咁簡單，例如重有石頭鍋飯、海鮮菜式，甚至手藝精巧嘅小食拼盤……不過傳統韓國菜食物擺設樸素，所以與西或日菜同放在餐桌時，賣相可能會比較輸蝕。」
Janet話其實一早已發現韓國菜喺呢方面的劣勢，所以在大學讀廚師烹飪課時，除咗主修韓國皇室菜之餘，重兼修了西菜及中國菜課程，一方面在保留韓國菜最真風味之餘，再湊合西廚和中國菜的色香味美；「好似我面前呢味皇室拼盤，由意式黃瓜、青瓜、蛋黃蛋白、帶子、冬菇、紅蘿蔔及肉碎，摻入一塊薄餅上食，單單係嗰塊薄餅就要做到如絲般幼滑，好似糯米糍咁柔軟煙韌，但攞上手時又唔會變形，真係唔簡單㗎！」
Janet可算出自廚藝世家：「媽媽曾當上十年的大餐廳經理，在韓國女性嚟講，已經係好少見，由於廚藝精湛，所以決定開班授徒……老媽教我煮菜，同佢一般學生好唔同，佢永遠唔會教我用料份量，佢話好嘅廚師要用眼同味覺，去感受好嘅菜式係點煮。」
Janet出嚟做嘢時先發現兒時特訓可以真正大派用場，除了在大學學煮菜，她明白實戰經驗是最重要的，不過韓國餐室酒店大多以男性做主，「喺佢哋心目中，女人要結婚、生仔，跟住就辭去工作相夫教子，所以工作加倍辛苦之餘，亦唔會教你煮菜！」
在離開韓國隻身來港前，Janet憑實力同經驗，已經升到去酒店的「二廚」，呢個當然唔係好多韓國女性坐到嘅位！後來嚟香港後，在中環一間高級韓國餐廳，短短二、三年間，現在已是一個行政總廚，「香港同韓國男性最大分別，係香港男人好有紳士風度，而且對女性好尊重，不過相較廚房工作，就冇韓國人咁用力拼搏啦！」
帶子海蜇沙律
大大粒嘅帶子，再加煙韌有咬口嘅海蜇及沙律菜，最後再加上黑白芝麻拌食，有中國菜嘅香口影子，另方面有西式沙律嘅新鮮口感。
背後有段古：Janet喺14歲初中時期，佢媽媽好鍾意喺屋企開Party，呢味帶子海蜇沙律撚手菜就必定成為枱上佳餚，「細細個就好想食，不過每次都要等到Party之後，好彩剩番少少先有機會食番夠本！講最懷念嘅屋企餸，一定係呢味！」
豆腐沙律
主角當然係豆腐，再加紫菜、蘑菇、自製醬油拌食，味道非常清，再加上係凍食，真係香滑到好似食豆腐花一樣。聽講中環好多OL都勁愛呢道菜，減肥功效點？小記都好難有個準確數據支持，不過可以話畀大家知Janet身材非常標準！
背後有段古：剛進入高中及大學時，Janet都曾經為體重問題而煩惱過，「當時老媽子話，做女人唔可以食太多嘢！但豆腐卡路里比較低，多食可以控制體重，佢話咁先至會多男仔追喎！」最初Janet好少理，但現在想起，才明白媽媽的苦心。
正宗皇室泡菜+牛肉飯
講到韓國菜最有代表性食品當然首推泡菜！Janet話韓國每家人都有自己一套醃菜不傳之秘，不過學皇室菜起家嘅Janet，當然係最正宗㗎啦！小記係少食辣之人，感覺呢個泡菜牛肉飯味道幾溫和，唔會有過辣嘅感覺，最厲害係牛肉放在熱石碗之內，由頭食到尾都可以保溫之餘，牛肉仍可以長久保持鮮嫩感覺！
韓式炸軟殼蟹
Janet強調喺韓國成日食呢味菜，主角當然係剛換殼、脆到連殼都食得嘅軟殼蟹啦！不過別出心裁之處係用薄薄一層米漿代替一般的炸粉漿，感覺係更合中國人口味。拌食醬料係用一種自製的酸辣汁，味道多酸少辣，最正係中和埋油炸及蟹肥膏嘅肥膩感，值得一讚！
Mr.Kim
地址：中環德己立街21號ThePlaza1-2樓
電話：28046883
營業時間：星期日至四6:30pm-11:00pm、星期五、六6:30pm-11:30pm