情操高尚嘅財政司司長梁錦松昨午上立法會接受議員質詢，好睇過六國大封相，八方好耐都未見過黃宏發咁High，亦好耐冇見林瑞麟局長咁狗。
是疏忽是無心之失還是公私太分明，其實唔使再問，反而行政會議邊個申報利益、之後邊個建議修改會議紀錄，就真係精采百出。林局長雖然以保密為由隻字不提，但愈係唔講咪愈係令人深信不疑。
可能有啲讀者冇時間睇直播，咁八方寫多一次，反正二十三條未通過，未算犯法。據靈通消息話，三月五號行政會議開會講預算案，有兩位成員主動申報買咗車，一個係楊醫生，另一個就係D九。一樣有買車嘅田北俊同梁振英，就冇申報。
到三月十一號再開會審議上次會議紀錄時，有人問楊醫生可否刪咗買車嗰一段；邊個係嗰位有心人呢？有兩個版本。
一個話係振英哥，另一個，嘩，真係唔寫得。至於大聲喝止話唔准改者，就係阿Ｔ。
振英哥因乜事咁做，八方都唔敢估，可能係同姓三分親啩。
講番黃宏發，佢昨午做主席主持會議，但不時自己加意見，例如聽到麥國風問係咪政治任命大晒唔使死，發叔竟然話即係「君要臣死，臣不可不死，君要臣生，臣不可以死」喎。另一個High嘅係陳偉業，話說阿松差唔多聲淚俱下咁話一切嘅錯都係因為老婆有咗而起，大嚿陳偉業就話從阿松呢次事件睇嚟，應該快啲立法，等男士都有產假放，免得再生意外。真係玩得高興。
傳真︰2623-9278
電郵︰