貴為樂壇天后，鄭秀文（Sammi）的工作有幾忙不用多說。難得的是，咁多工作依然可以Keep到皮膚又白又滑，尤其身形更是公認的衣架子，的確恨死不少女士。今次Sammi公開自己的扮靚心得，話最鍾意的妝容是：「白臉、紅唇同條眉夠突出的妝，因為夠晒搶眼豔麗。」唔理你是否其Fans，在貪靚心態作祟下，無理由不偷偷師吧！
記者：羅惠芬
攝影：陳盛臣、陳智良
一向注重護膚工作的鄭秀文，擁有敏感及偏乾的肌膚，容易受天氣影響而產生變化。「小時候更試過皮膚敏感，情況嚴重到成面出紅疹，嘴唇更腫到好似孖膶腸一樣。」從此她要遠離一切含有香料成份的護膚品，否則皮膚便會出現過敏反應。
「我唔會有心機搽十幾種嘢喺面上，護膚程序愈簡單愈好。如果我只可以擁有一件護膚品，SK-ⅡWhiteningMask係我必然之選。」
翻查資料，原來Sammi初出道已經對鮮紅唇膏情有獨鍾，無論拍硬照抑或出席記招，都以勁Sharp紅唇見人。直至近年興玩NudeLook，紅唇的出場次數才減少。
要鄭秀文自選最靚的地方，她諗了很久，最後才揀了自己一對眼眉。「因為夠自然囉！最重要係有化妝師阿Zing幫我畫嘛！」她說出街可以唔化妝，但一定要畫眉，就證明她對自己一對眼眉有幾重視。
初入行時的Sammi有130磅，高峯時期更有136磅。當年她立定決心，進行地獄式減肥，勁做運動之餘，更試勻各種減肥餐單，現時她的體重一直維持在110磅左右，Fit得很。「以前覺得愈瘦愈好，但𠵱家我唔再Care體重，最重要是身形靚，可以Carry到時裝。」
Sammi用過的瘦身餐單中，她覺得這個菜湯餐單效果最好。以菜湯為主要食糧，連續飲用一星期，每天更可以配不同食物。
湯料：洋葱6個、番茄4至6個、椰菜1個、青椒2個、芹菜半棵、少許鹽、胡椒粉、咖喱粉和芫荽。
第一天配西瓜或皺皮瓜。
第二天配蔬菜，另可吃一個焗薯仔。
第三天配生果和蔬菜。
第四天配香蕉（最多三隻）和脫脂奶。
第五天配番茄和10-12安士牛肉。
第六天配蔬菜及2-3塊牛扒。
第七天配糙米、蔬菜、水果。