天氣回暖，四周霧氣沉沉，人也特別容易疲倦兼無胃口，最好煮些開胃祛濕菜畀家人醒一醒胃。假如大家正苦惱煮乜好，而無從入手的話，不如等讀者王太教大家兩招，將平平無奇的黃豆同尖嘴椒一齊炒，即成為一款解決胃口欠佳問題兼祛濕氣的清爽餸菜；再配以楊桃魚湯佐膳，有痱滋可消除，無痱滋則都可滋潤一下。
記者：陳冰麗
攝影：陳陶鈞
一碟有齊豐富肉及植物性蛋白質，兼有纖維素的雙椒炒黃豆，清爽而不膩，絕對適合老少享用。這道菜其實是王太兩年前買餸時，得菜檔老闆娘指點而來。話說王太與老闆娘閒話家常，說起天時濕熱，不知食乜好？王太正傷腦筋之際，老闆娘便將自己經常煮畀家人食的炒黃豆介紹給王太，有見用料大眾化，做法又簡單，王太便即管一試，估不到一向「奄尖聲悶」的仔女，竟然大讚此餸好味，而且愈食愈開胃，於是每遇上他們嚷着濕熱或無胃口之時，王太就梗會炮製呢味餸。
材料：
尖嘴椒 2隻
燈籠椒 1個
菜甫粒 適量
瘦肉粒 4両
黃豆 2両
蘋果魚湯可能大家飲得多，配以楊桃煲可是首次，還是從王太口中才得知可以如此配搭，而且味道重相當不俗，在沒有加薑之下煲魚湯，還出奇地沒有腥味。問王太蹺妙所在，答案是要先煎香條魚！據王太講，鯽魚楊桃湯對治療痱滋、暗瘡有相當療效，細仔因為青春期，面上常出現暗瘡，阿女又因為經常要捱夜而搞到虛火盛，生痱滋，王太就定期煲呢個湯給他們飲用，王太重話以此湯作為平常佐膳，亦具滋潤功效，老少都啱飲㗎！
材料：
鯽魚 1條
楊桃 1個
蜜棗 2粒