嚟緊兩日歐冠盃尾輪比賽對某啲球隊嚟講係例行公事，求大俠奉勸各位與其信教練賽前廢話，倒不如捱眼瞓臨場睇完個陣至出手，否則神仙難救。
好似祖記教練納比話一日未正式出線都唔會輕敵；但佢哋呢個周末響聯賽作客火併AC米蘭，今場鬥巴素利唔大敗就過關，戰意難測。另一場拉科對曼聯，拉科教頭艾路列達就話唔手軟，但嚟緊禮拜日佢哋響西甲硬撼皇馬，今場鬥曼聯無關痛癢使唔使去盡呀？曼聯睇見兵工廠兵敗布力般，應該會更加搏命爭聯賽，今次作客西班牙……
近期聽唔少人埋怨有啲波網賽前公布嗰陣，同實際落場有出入，建議大家幾大喺開波四十五分鐘之前入
舒利亞早幾日講完「覺得自己有能力為國家隊作出貢獻」之後，即刻引起班英國報紙佬大做文章。不過老舒冇耐就走出嚟話係就係曾經諗過復出國際賽，但個念頭好快就打消咗，叫大家咪太敏感。咁又係喎，人哋話有能力啫，冇話一定要做。有口痕友話可能老舒想令英軍教頭艾歷臣空歡喜一場，是非黑白留番大家求驗嘞。
愛華頓領隊莫耶斯日前話唔會「買斷」美國借將麥拜迪，理由係會方唔想用哥倫比海盜隊提出嘅一百七十萬鎊，買一個三十一歲嘅球員。交易唔成麥拜迪下個月一號就要返歸。我求大俠聽完好心噏，因為佢嚟到愛華頓真係踢得好好。如果我話事死人都「買斷」佢，踢到下屆歐冠盃嘅話，一百七十萬鎊算得乜？
啱啱嗰輪歐洲各大主要聯賽特別多十二碼宴客。好似國米對科木就有兩球射失、飛燕諾險勝NEC尼美根又有賴對方射失十二碼；最慘都係些路迪前鋒赫臣，佢完場前射失十二碼令隊波響聯賽盃決賽輸畀流浪。到深宵我求大俠睇住華倫西亞對畢爾包有得射十二碼，都覺得有暗湧，估唔到真係宴客，重要轉頭輸埋波㖭。
龍門杜迪俾利物浦解凍後一直無犯過失，估唔到前日對熱刺又「舊病復發」，接唔實泰利高個射門俾個波溜入，認真係「牛油手」。杜迪失完球波後個樣驚驚青青。好彩隊友生性，最後贏番場波。可能利記領隊侯利亞已經俾杜迪煩夠，所以星期四嘅歐洲足協盃，決定收起上次吐口水嘅麻煩友迪奧夫。