熟客仔明益事頭婆<br>馮仁昭四圍超:Eason拮鹵味免費賣廣告

熟客仔明益事頭婆
馮仁昭四圍超:Eason拮鹵味免費賣廣告

陳奕迅(Eason)前晚九點幾喺灣仔出現,佢同助手、司機喺街口兩個小食檔拮嘢食,Eason重即時拮咗串滷味,食得非常滋味,跟住重將碗仔翅同腸粉打包。
Eason見到記者影相,初時好愕然,不過隨即就發揮佢嘅搞笑本色,幫小食店老闆娘賣晒廣告。佢話:「快啲影吓啲檔口,影吓事頭婆啦,記住影清楚檔口呀!」原來小食檔喺英皇集團中心對面,Eason成日過嚟幫襯,所以幫手賣吓廣告。

借潤唇膏畀霆鋒
醫完肚後,Eason就去咗會展舊翼,做蔡志明旭日集團三十周年晚宴嘅表演嘉賓,有記者問Eason係咪同謝霆鋒合作拍廣告,佢話好耐冇見霆鋒,所以早幾日先約埋一齊飲嘢,並唔係會合作。
至於對霆鋒復出有乜嘢睇法,Eason又發揮佢嘅無厘頭本色,佢話:「復出冇特別,佢都冇退出過,都係咁啦,雙手插袋,嘴唇乾啲,我有好多潤唇膏可以借畀佢。」

莫文蔚救星爺義不容辭
莫文蔚(Karen)噚日去咗中環聖約翰大樓,獲聖約翰救護機構委任為「聖約翰大使」。
學過急救嘅Karen,聽到前男友周星馳扭親,佢即刻話會幫星爺。最近星爺向寰宇電影老闆林小明發律師信,問Karen會唔會因為同星爺係老友而推拍《功夫足球》電視版,佢就話:「公司決定啦!時間係最大要考慮嘅問題,我都好耐冇同周星馳聯絡,各有各忙。」

Juno牛一有fans陪
麥浚龍(Juno)今日十九歲生辰,佢噚日去新城電台接受《聯fan所》訪問,Juno嘅歌迷專誠送生日禮物畀佢,有歌迷重親手整咗個生日蛋糕,佢哋話會去Juno屋企同佢預祝㖭!提到生日願望,Juno話:「我今年好多嘢做,我希望身體健康,一切順利,唔好唔舒服。」

張栢芝自認絕種專一
張栢芝噚日接受港台《娛樂滿天星》電話訪問,對於有關自己嘅花弗傳聞,佢話:「老實講,我係個絕種專一嘅人,因為我男仔頭性格,同男仔好傾啲,所以人哋以為我啲朋友全部都係男仔囉。最緊要過到自己嗰關,人哋話我花弗唔緊要,自己覺得冇問題就OK!」

陳司翰失戀暱屋企
陳慧琳嘅細佬陳司翰𠵱家同陳怡蓉喺台灣拍緊台劇《又見橘花香》,佢日前同台灣記者講已同拍拖四年嘅女友分手。陳司翰用國語話:「我們曾計劃過將來,但我在台灣拍劇,她在英國念書,大家各有各忙。」面對失戀,陳司翰話心情好差,重試過幾日暱埋屋企唔出聲。

劉璇唔敢打東東主意
劉璇噚日真係畀足面,返學時間都抽空去北京新開張嘅寧記火煱。一見到劉璇,就即刻諗起張栢芝,因為佢哋真係好似樣。
問劉璇有冇拍拖?佢話自己好鈍,所以唔知係唔係有人追。記者見佢個樣咁似栢芝,不如揀陳曉東做男朋友啦!佢笑住咁話:「東東有嘉慧姐(陳曉東經理人)就足夠啦!」

小食檔近住英皇,所以Eason成日嚟幫襯。

莫文蔚

Juno

張栢芝 資料圖片

陳司翰(左)、陳怡蓉(右)

劉璇