上周五恒指升幅，幾乎冇晒。滙豐（005）相對比較穩定，收82.50元，跌50仙。滙豐呢兩日「強勢」，但大勢欠佳，市場喺度等美伊事件發展，滙豐亦難獨善其身，不妨諗少少滙豐Put輪做吓世界。
滙豐Put輪對象係9588。滙豐末期息2.535元，明日除息對Put輪有利。恒生（011）昨日除息3.30元，實際只微升5仙，收82元。滙豐除息，估計亦難有實際升幅。
9588喺5月6日到期，現價89仙，溢價3.2%，槓桿率9.3倍，滙豐明日除息後，假設調整落79.97元之理論價，隻輪即時變成幾乎平水。滙豐除息則對Call輪不利，例如Call輪9725，8月到期，溢價5.2%，槓桿率22倍，兩日後，假如正股同隻Call輪價格冇乜變化，則溢價即時升上8.5%，會俾人覺得貴咗。
上周五美國油價散咗，中海油（883）由10.45元跌落10.20元，25仙跌幅唔算大，但Call輪9299則散晒，收1.2仙，唔見52%。下周五夠鐘，行使價10.29元，如果幾日內正股升唔夠30仙，隻輪就係咁先。若然美伊局勢亂過亂世佳人，油價亂升，正股起5%，則隻末日輪可急升3倍，呢隻輪有一定嘅投機價值，但落注當然要預咗冇晒。
章盛