炒股方法五花八門，有人喜歡基本分析，有人鍾意技術分析，亦有人兩者兼用。趙飛雲識得一位前輩，炒股主要靠經驗靠感覺，好似漁民唔識天文學，憑經驗可知「日暈而風，月暈而雨」。
趙飛雲炒股主要睇技術走勢，但有時都信感覺。近排雖然刻意少睇報紙，少聽新聞，但仍然有一種「亂」嘅感覺，所以近期睇市偏淡為主。
近年各國更換領導人，都似乎新不如舊，較大影響係以色列鷹派沙龍當選總理，結果令稍現曙光的中東和平重新進入黑暗時代，布殊當選美國總統，更是火上加油，其後發生的911事件、攻打阿富汗，以及即將爆發的美伊戰事，基本上是事件的延續。美國近年戰事得利，已忘記越戰的教訓，日後將更易開啟戰端，今次美國繞過聯合國亦要攻打伊拉克，對日後的世界秩序造成極壞影響。股市的發展主調在於和平安定，一旦戰亂頻生，破壞經濟，股市如何會好？
今次美國若不獲聯合國授權而出兵伊拉克，就算戰事順利，股市亦只會在開戰初期反彈，之後則視乎國際局勢發展，估計將以偏淡為主。
香港近日更是一波未平一波又起，梁錦松偷步買車事件愈演愈政治化，董建華政權又醞釀新危機；非典型肺炎肆虐可大可小，處理不當可能釀成大災難，議員官員忙於「杜松」及「護松」，怎能讓人不擔心？如此氣氛下，股市易跌難升，散戶最好暫離場。
趙飛雲