財政司司長梁錦松偷步買車事件愈鬧愈大，雖然昨日他出席立法會交代事件始末，但普遍演藝界藝員對他繼續擔任財爺能力和個人誠信表示質疑，認為他應該盡快辭職，以息民憤。
財政司司長梁錦松偷步買車事件，除了廉政公署會跟進調查外，昨日梁錦松在立法會交代事件經過，會上不少議員更質疑他的誠信和擔當財政司司長的能力。
昨日本地演藝界十分留意電視直播梁錦松在立法會向議員作出交代的過程，記者訪問了張智霖、古天樂、張堅庭、余文樂及蒙嘉慧等藝人，他們普遍質疑梁錦松的誠信，認為他應該順應民意下台。
張智霖：作為香港嘅小市民，我諗好多人嘅心情同我都係一樣，對現政府有好多不滿。唔理佢有心定冇心隱瞞，佢嘅誠信肯定受到市民質疑，就算佢係一時疏忽，作為財政司咁重要嘅官職，點放心畀個咁大意嘅人做？佢最好順應民意落台，以息民怨，唔好再戀棧權位，特首係應該接受佢請辭。
張堅庭：件事已經愈描愈黑，我依然覺得財爺要請辭，咁樣件事就可以告一段落。至於有停職警務人員向廉署舉報財爺，依照程序徹查係啱嘅。巿民冇能力監察，惟有靠傳媒，總之財爺有錯就要認。
古天樂：偷步買車件事鬧到咁大，特首都講到明佢係違反咗高官問責制嘅守則，既然佢本身有咁多問題，佢自己應該好好諗吓，應唔應該再留低做呢個位。𠵱家香港經濟咁差，梁錦松做嘅財政預算案劣評如潮，市民怨聲四起，如果政府再唔理市民嘅反對聲音，只會搞到不同行業嘅人都走出嚟抗議。
余文樂日前亦質疑財爺：佢自己就住大屋、揸靚車，政府畀車佢揸、畀屋佢住，加稅就加我哋啲小巿民，佢食嘅住嘅，咪係我哋畀佢！我哋出緊糧畀佢喎，我都諗唔到佢有乜嘢係要自己畀錢，重要偷步走去買車，真係過份！
蒙嘉慧：今日我都睇咗電視直播，其實我信佢冇心避稅，但對佢嘅誠信我係有質疑，因為第一次佢出嚟交代件事，佢對住記者話一月決定買車，二月先決定傾汽車首次登記稅嘅事情，但事實根本唔係咁，好明顯佢係講緊大話。呢樣嘢令我好唔舒服，既然件事搞到咁嘅局面，好老實大眾對佢繼續做財爺嘅能力肯定唔放心，佢最好辭職平息呢件事，唔好連累成個政府聲望。
採訪：陳月媚、張止寒、比華利
