大角嘴帝柏海灣早前以優惠促銷貨尾，中原地產奧運站分區經理蔡日基話，佢哋市場佔有率達六成，淨係相連單位都做咗三單。
蔡日基透露，佢哋有好成績，其中一個原因係幫客諗埋將個單位點搞。日前有個荃灣區買家想買千三呎單位，但樓底只得九呎，所以佢哋建議改買樓底有十四呎嘅千四呎相連單位，就可以自製多一層，變成相連複式單位，樓面增加到二千呎。個客言聽計從，即刻用六百二十萬入市。
不過，個客咁做，唔知要唔要向政府申請呢？
另外，中原將軍澳助理營業董事譚桂貞話，佢哋將軍澳廣場嘅成績遠遠拋離對手，重做到多間頂層連天台同相連單位。譚桂貞又話，外區同事嘅支援都好重要，新界區派咗成百個同事支援。另外，唔少同事一日只係瞓四個鐘，咁拼命梗係有好成績啦。
發展商賣樓，好多時會提供免費飲品同食品，又會送禮品或者搞吓抽獎，務求吸引市民睇樓。𠵱家內地樓盤有樣學樣，雅居樂集團今個月二十九號到下個月一號，喺尖沙嘴新世界中心舉行聯合展銷，參觀人士有機會贏到名貴禮品，最矚目係一部價值逾十萬嘅四門房車。買家就有折扣回贈。
中原（中國）副總經理李勁峰講，雅居樂集團旗下十個內地樓盤，一次過喺香港做展銷，以顯示實力，包括港人熟悉嘅中山雅居樂，重有廣州項目。
聽講，呢個展銷同場會有招聘同招商會，吸引港人北上工作同投資，一舉數得。
利嘉閣地產成立「至尊豪宅」，積極培訓豪宅部員工，重要了解富豪嘅生活品味。因此短期內會舉行「茶道」班，擴闊同提升同事嘅品味。
利嘉閣香港住宅部營業董事張偉文話，今次搞茶道班，係因為上次第一炮嘅紅酒試酒會反應理想，兼且增加咗同富豪嘅話題。難怪利記豪宅組近嚟做一手樓成績咁出色。睇嚟呢啲活動將會陸續有嚟。
長實賣咗一段時間嘅大角嘴凱帆軒，最近重新包裝，宣傳攻勢又開始鋪天蓋地，蘭西自然感受到呢股威力。
噚日佢哋開記招，介紹樓盤會所，今日又開記招，講租轉售計劃，同分析買家資料；聽日至講開售價，總之係日日見住佢哋。呢個盤見報率肯定高。發展商為咗要吸引傳媒採訪，諗橋諗到頭都大埋。但買家最有興趣嘅，相信始終係價錢。
將軍澳廣場開價創同區新低，忙於賣樓嘅地產代理都買番間。美聯區域經理郭玉滿話，旗下南豐廣場客戶經理何美玲，啱啱以百四萬，買咗二座高層D室，五百九十方呎嘅兩房單位，畀足三成首期，果然有實力。據了解，何小姐來頭唔細，係美聯舊年嘅topsales。
據講，買樓做業主係佢入行以來嘅心願，𠵱家終於夢想成真。
蘭西
電郵地址：
